काठमाडौँ - नेपाल एयरलाइन्सले फ्लाइटको समय परिवर्तन गरेको विषयमा सबै यात्रुलाई जानकारी दिएको दाबी गरेको छ । आज एक विज्ञप्ति जारी गर्दै एयरलाइन्सले सो दाबी गरेको हो । 

काठमाण्डौ- दुबईको उडान नं. RA 229 को नियमित उडान समय रिसेड्युल भई २१:३० बजे राखिएको र यात्रुहरूको उपलब्ध भएको इमेल, फोन नम्बर र ट्राभल एजेन्सी मार्फत् सेड्युल परिवर्तन भएको जानकारी गराइएको विज्ञप्तिमा भनिएको छ । 

बुधबार काठमाडौँ दुबईको उडान समय अगाडि सारेर उडान गर्दा ३१ यात्रु छुटेको यात्रु उज्ज्वल विक्रम राणाले सामाजिक सञ्जालमा उल्लेख गरेका छन् । 

२७४ यात्रु मध्ये केही यात्रुहरू उडानमा छुटेकोप्रति एयरलाइन्सले माफी माग्दै आज वैकल्पिक उडानबाट सबै यात्रुलाई गन्तव्यमा पुर्याइने जनाएको छ । 

जलवायु परिवर्तनसम्बन्धी संयुक्त राष्ट्रसंघीय सम्मेलन कोप–२८ मा सहभागी हुन नेपाली प्रतिनिधिमण्डलको नेतृत्व गर्दै बुधबार राति ९ः३० मा प्रधानमन्त्री दुबई गएका थिए । ११ः३० को फ्लाइट प्रधानमन्त्री जाने भनेपछि ९ः३० मा सारिएको थियो ।