काठमाडौँ- इङ्‌ल्याण्डले जारी टी-२० विश्वकप अन्तर्गत ओमानमाथि शानदार जित हासिल गरेको छ । गएराति भएको खेलमा इङ्‌ल्याण्डले ओमानलाई ८ विकेटले पराजित गरेको हो ।

ओमानले दिएको ४८ रनको लक्ष्य पछ्याएको इङ्‌ल्याण्डले ३.१ ओभरमा २ विकेट गुमाउँदै लक्ष्य पुरा गरेको थियो ।

यस अघि पहिला ब्याटिङ गरेको ओमान १३.२ ओभरमा ४७ रनमा अल आउट भएको थियो । ओमानका लागि शोयब खानले ११ रन बाहेक अन्य कुनै ब्याट्सम्यानले दोहोरो अंकमा रन बनाउन सकेका थिएनन । इङ्‌ल्याण्डका बलर आदील रशिदले सर्बाधिक ४ विकेट लिए भने जोफ्रा आर्चर र मार्क वूडले ३-३ विकेट लिएका थिए ।

यो फर्किलो जितले इङ्‌ल्याण्डको सुपर आठको सम्भावनालाई कायमै राखेको छ । इङ्‌ल्याण्डको ३ खेलमा ३ अंक भएको छ । समुह बी बाट अस्ट्रेलियाले ३ खेलमा तिनै खेल जितेर ६ अंकसहित सुपर आठमा पुगिसकेको छ भने भने स्कटल्याण्ड ३ खेलमा ५ अंकसहित दोस्रो स्थानमा रहेको छ । त्यस्तै इङ्‌ल्याण्ड ३ खेलमा ३ अंकसहित तेस्रो स्थानमा छ ।  यस समुहबाट नामिबिया र ओमान बाहिरिइसकेका छन् ।

अब अस्ट्रेलियाले स्कटल्याण्डसँग जुन १६ मा र इङ्‌ल्याण्डले नामिबियासँग जुन १५ मा खेल्ने तालिका रहेको छ । अब अस्ट्रेलियाले स्कटल्याण्डलाई पराजित गरेमा र इङ्‌ल्याण्डले नामिबियालाई पराजित गरेमा मात्र इङ्‌ल्याण्ड सुपर आठमा पुग्ने छ ।