विराटनगर । प्रदेश १ को सभामुख पदका लागि माओवादी केन्द्रका बाबुराम गौतम सत्ता साझेदारका तर्फबाट उम्मेदवार बनेका छन् । मंगलबार बसेको प्रदेशसभा बैठकमा ज्येष्ठ सदस्य गयानन्द मण्डल गनगाईले पुस २८ मा सभामुखको निर्वाचन गर्न समय तोकेपछि प्रदेशसभा सचिवालयले आजै सूचना निकालेर निर्वाचन कार्यतालिका सार्वजनिक गरेको थियो ।

कार्यतालिका अनुसार अपरान्ह ३ देखि ५ बजेसम्म सभामुख पदका लागि उम्मेदवारले मनोनयन दर्ता गर्ने समय तोकिएको थियो । सत्ता साझेदार दलहरुबीच भएको सहमति अनुसार प्रदेश १ मा पाँच वर्षका लागि सभामुख पाएको नेकपा माओवादी केन्द्रका तर्फबाट गौतम सभामुखको उम्मेदवार बनेका हुन् । ओखलढुंगा प्रदेशसभा क्षेत्र (२) बाट निर्वाचित गौतमलाई सभामुख बनाउन नेकपा एमाले संसदीय दलका प्रमुख सचेतक रेवतीरमण भण्डारीले प्रस्ताव गरेका छन् ।

मनोनयन पत्रमा माओवादी केन्द्रका प्रदेशसभा सदस्य नारायणबहादुर मगर, नेकपा एकीकृत समाजवादीका कमलप्रसाद जगेवु र राप्रपाका गोपाल बहादुर विश्वकर्माले समर्थन गरेका हुन् ।

एमालेका प्रमुख सचेतक भण्डारीले आफूहरुले केन्द्रीय सहमति अनुसार भएका निर्णयहरुमा सत्ता साझेदारहरुबीच भएको पद भागबण्डामा समर्थन गर्ने नीति लिएको बताए । उनले माओवादी केन्द्रबाट सभामुखको उम्मेदवार बनाइएका गौतमलाई एमालेले निर्वाचित गराउने बताए । ‘हामीले सहमति अनुसार सदाशयता राखेका छौं’ भण्डारीले भने, ‘उपसभामुखमा स्वभाविक रुपमा एमाले हुने सहमति छ, त्यसमा वहाँहरुले पनि राख्नुहुनेछ भन्ने विश्वास छ ।’

मुख्यमन्त्रीमा आलोपालोको माग गर्दै सोमबार गठित मन्त्रिपरिषद्‌मा माओवादी केन्द्र सहभागी भएको छैन । सरकारलाई गरेको समर्थन कायमै राखे पनि माओवादी केन्द्र अझै सरकारमा सहभागी नहुँदा सत्ता साझेदार दलहरुबीच अझै पनि विश्वासको बलियो वातावरण बन्न नसकेको नेताहरुले बताएका छन् । संविधानको धारा १८२ को उपधारा (१) मा प्रदेशसभाको पहिलो बैठक प्रारम्भ भएको मितिले १५ दिनभित्र प्रदेशसभाका सदस्यहरुले प्रदेश सभामुख र प्रदेश उपसभामुखको निर्वाचन गर्ने व्यवस्था अनुसार पुस २८ गते बिहीबार सभामुख र पुस ३० गते शनिबार उपसभामुखको निर्वाचन गर्ने दलहरुबीच सहमति भएको छ ।

प्रदेशसभा नियमावली २०७४ अनुसार सभामुख र उपसभामुखको निर्वाचन छुट्टाछुट्टै तालिकामा हुनेछ । पहिले चरणमा हुने सभामुख निर्वाचनको कार्यतालिका अनुसार पेश भएको उम्मेदवारीमा आजै दाबी विरोध गर्ने र बेलुका ७ बजे उम्मेदवारको अन्तिम नामावली प्रकाशन हुने प्रदेशसभा सचिवालयले जनाएको छ ।