बुटवल- रुपन्देहीको तिलोत्तमामा छुरा प्रहार गरेर एक युवाको हत्या भएको छ । घटनामा ३ जना घाइते भएका छन् । सोमबार साँझ दुई समूहबीच ग्याङ फाइट भएको हो । तिलोत्तमा–९ मा भएको घटनामा मकवानपुर हेटौंडाका २४ वर्षीय सुरेश सेन्तानको मृत्यु भएको हो ।

यसैगरी घाइते हुनेहरूमा काठमाडौं महानगरपालिका–१ का विकास वाईवा, मकवानपुर गढी गाउँपालिका–६ का राजु तामाङ र मकवानपुरकै हस्ता सिंह रहेका छन् । घाइतेहरूलाई थप उपचारका लागि यूनिभर्सल मेडिकल कलेज भैरहवा पठाइएको बुटवल प्रहरीले जनाएको छ ।

घटनामा संलग्न भएको आरोपमा १३ जनालाई नियन्त्रणमा लिई अनुसन्धान भैरहेको ईलाका प्रहरी कार्यालय बुटवलका प्रहरी नायव उपरीक्षक दानबहादुर थापाले जानकारी दिए ।