बुटवल । चार जनाको मृत्यु हुने गरि अर्घाखाँचीको भूमिकास्थानमा भएको आगजनीको घटनामा संलग्न भएको आशंकामा चार जना पक्राउ परेका छन् । 

चार दिनअघि भूमिकास्थान नगरपालिका २ तिरतिरे खोला गाउँका पदम वेल्वासेको घरमा आगो लागेको थियो । सो आगो निभाउनेक्रममा चार जनाको मृत्यु भएको थियो । आगो निभाउने क्रममा घाइते भएका एकै गाउँका चारै जनाको मृत्यु भएको थियो ।

जंगलमा रहेका केही जंगली जनावर मार्ने उदेश्यले स्थानीय देविराम वेल्वासे, धर्मराज वेल्वासे, दिपक विक र दिनेश थापाले जंगलामा आगो लगाएको प्रहरी अनुसन्धानवाट खुलेको जिल्ला प्रहरी कार्यालय अर्घाखाँचीका सूचना अधिकारी प्रहरी निरीक्षक कृष्ण प्रसाद घिमिरेले बताए । उनीहरु चारैजनालाई नियन्त्रणमा लिई अनुसन्धान अघि बढाइएको छ ।

प्रहरीकाअनुसार घटनामा संलग्नद्धय देवीराम र धर्मराजले जंगलमा बँदेललगायतका जनावर देखेपछि त्यसलाई मार्नका लागि आगो लगाएका थिए । उनीहरुले थप सहयोगका लागि दिपक र दिनेशलाई समेत वोलाएका थिए । जंगली जनावर मार्नका लागि लगाईएको आगो विस्तारै फैलिएर वस्तीमा पुगेको थियो ।

बस्तीमा आगो लागेको देखेपछि स्थानीयवासी आगो निभाउनका लागि जुटेका थिए । सो क्रममा पिताम्वर वेलवासे, माधव वेल्वासे,धनश्याम वेल्वासे र पदमप्रसाद वेल्वासे घाईते भएका थिए । उनीहरुको उपचारका लागि अस्पतालहरुमा लैजाँदै गर्दा मृत्यु भएको हो ।  

आगोलागीमा परेर घाइते भएकी २६ वर्षीया अस्मिता बेल्वासेको अवस्था सुधारोन्मुख छ् । उनको पाल्पाको मिसन अस्पतालमा उपचार भैरहेको छ । मंगलबार लागेको आगोबाट थप क्षति हुन नदिन नेपाल प्रहरी, सशस्त्र प्रहरी, स्थानीय बासिन्दा र जनप्रतिनिधिको सक्रियतामा नियन्त्रणमा लिएसंगै अन्य घरहरु जोगिएका थिए  ।