टी-ट्वान्टी सिरिज : नेपालले पीएनजीविरुद्ध फाइनल खेल्ने
फागुन २९, २०८०
काठमाडौँ- हङकङमा जारी त्रिकोणात्मक टी-ट्वान्टी अन्तर्राष्ट्रिय क्रिकेट सिरिजको फाइनलमा नेपालले पपुवा न्यूगिनी (पीएनजी) को सामना गर्ने भएको छ ।
मंगलबार भएको निर्णायक खेलमा हङकङलाई १० विकेटले पराजित गर्दै पीएनजीले फाइनलमा स्थान सुरक्षित गरेको हो ।
यसअघि मंगलबार बिहान भएको खेलमा नेपालले पीएनजीलाई नै ८५ रनले पराजित गर्दै फाइनलमा स्थान सुरक्षित गरेको थियो । नेपाल र पीएनजीबीचको फाइनल बुधबार हुनेछ ।
मंगलबारको खेलमा हङकङले दिएको १ सय २२ रनको लक्ष्य पीएनजीले १२ ओभर ४ बलमा विना विकेटको क्षतिमा पूरा गर्यो ।
पीएनजीको जितमा सेसे बाउले ६१ रन तथा टोनी उराले ५१ रन जोडे । यसअघि हङकङले १८ ओभर ३ बलमा सबै विकेट गुमाएर १ सय २१ रन बनायो । हङकङका लागि जिसन अलीले सर्वाधिक ५५ रन जोडे ।
