न्यूजिल्यान्डका कप्तान विलियम्सनले दक्षिण अफ्रिकाविरुद्ध खेल गुमाउने
कात्तिक १५, २०८०
काठमाडौँ- न्यूजिल्यान्डका कप्तान केन विलियम्सनले भारतमा जारी आईसीसी एकदिवसीय क्रिकेट विश्वकपअन्तर्गत दक्षिण अफ्रिकाविरुद्ध खेल पनि गुमाउने भएका छन् ।
दक्षिण अफ्रिका र न्यूजिल्यान्डबीचको खेल पुणेस्थित महाराष्ट्र क्रिकेट एसोसियसन स्टेडियममा नेपाली समयअनुसार दिउँसो २:१५ बजेबाट सुरु हुने तालिका रहेको छ ।
तर बंगलादेशविरुद्धको खेलका क्रममा हातमा चोट बोकेका विलियम्सनले दक्षिण अफ्रिकाविरुद्ध खेल गुमाउने न्यूजिल्यान्ड क्रिकेटले जनाएको छ ।
बंगलादेशविरुद्धको खेलका क्रममा ७८ रन बनाएर ‘रिटायर्ड हर्ट’ भएयता विलियम्सनले अफगानिस्तान, भारत र अस्ट्रेलियासँगको खेल गुमाइसकेका छन् ।
न्यूजिल्यान्डले अर्को खेल नोभेम्बर ४ मा पाकिस्तानविरुद्ध खेल्दैछ । विलियम्सनले सो खेल खेल्ने वा नखेल्ने अहिले निर्णय भने लिइएको छैन ।
