झापा - झापाको गौरीगञ्ज गाउँपालिकाको अध्यक्षमा फूलवती राजवंशी र उपाध्यक्षमा पूजन न्यौपाने कुँवर निर्वाचित भएका छन् । 

अध्यक्षमा निर्वाचित राजवंशी नेपाली कांग्रेसका तर्फबाट तथा कुँवर नेपाल कम्युनिष्ट पार्टी (एमाले)का तर्फबाट उम्मेदवार रहेका थिए । झापाका १५ पालिकामध्ये अध्यक्ष र उपाध्यक्ष नै महिला निर्वाचित भएको यो पहिलो पालिका हो । 

राजवंशीले पाँच हजार ६८९ मत प्राप्त गरे । उनका निकटतम प्रतिस्पर्धी एमालेका विजयकुमार अग्रवालले तीन हजार ३३० मत प्राप्त गरे । त्यस्तै राष्ट्रिय प्रजातन्त्र पार्टीबाट उम्मेदवार रहेका बाबुराजा श्रेष्ठले तीन हजार ३०७ मत प्राप्त गरे । अघिल्लो निर्वाचनमा श्रेष्ठ गाउँपालिका अध्यक्षमा निर्वाचित भएको थियो भने यस पटक राजवंशीले श्रेष्ठलाई पराजित गरे । 

उपाध्यक्षमा निर्वाचित कुँवरले चार हजार ७५५ मत प्राप्त गरे । उनले कांग्रेसका उम्मेदवार मखना महतोलाई पराजित गरे । महतोले तीन हजार ७९५ मत प्राप्त गरेका थिए । ६ वडा रहेको यो पालिकामा वडा नं १ मा वडाअध्यक्षको मत पुनः गणना भइरहेको छ भने  २ मा नेपाल कम्युनिष्ट पार्टी (माओवादी केन्द्र)का किनालाल राजवंशी, ३ मा श्रवण गिरी, ४ मा फेकाप्रसाद गिरी, ५ मा विजयप्रसाद सिंह नेपाल कम्युनिष्ट पार्टी (एमाले)का तर्फबाट निर्वाचित भए । 

यता वडा नं ६ मा नेपाली कांग्रेसका उम्मेदवार वद्रीनारायण यादव निर्वाचित भए ।