काठमाडौँ- साविक विजेता म्यानचेस्टर सिटी इंग्लिस प्रिमियर लिगको शीर्ष स्थानमा उक्लिएको छ । शनिबार राति भएको खेलमा एएफसी बर्नमाउथको पोस्टमा गोलको वर्षा गर्दै सिटी शीर्ष स्थानमा उक्लिएको हो ।

सिटीले आफ्नै घरेलु मैदान इतिहाद स्टेडियममा बर्नमाउथमाथि ६-१ गोलअन्तरको जित निकालेको हो ।

सिटीको जितमा बर्नार्डो सिल्भाले २ गोल गर्दा जेरेमी डोकु, मानुएल अकान्जी, फिल फोडेन र नाथन आकेले एक-एक गोल गरे । बर्नमाउथका लागि लुइस सिनिस्टेराले एक गोल फर्काए ।

जितसँगै ११ खेलबाट सिटीले २७ अंक जोडेको छ । यता दोस्रो स्थानमा झरेको टोटेनहमले १० खेलबाट २६ अंक जोडेको छ ।

शनिबार राति नै भएको अन्य खेलमा तेस्रो स्थानको आर्सनलले छैटौँ स्थानको न्यूकासलसँग १-० को पराजय भोग्दा आठौँ स्थानको म्यानचेस्टर युनाइटेडले १४ औँ स्थानको फुलह्यामलाई १-० ले पराजित गर्‍यो ।