जर्जियाको पोस्टमा स्पेनको सात गोल
काठमाडौँ- युरो कप छनोटअन्तर्गत स्पेनले जर्जियामाथि शानदार जित हात पारेको छ । समूह ‘ए’ अन्तर्गत शुक्रबार राति भएको खेलमा स्पेनले जर्जियालाई ७-१ गोलअन्तरले पराजित गरेको हो ।
छनोटअन्तर्गत एक खेलमा हार बेहोरेको स्पेनको यो तीन खेलमा दोस्रो जित हो ।
शुक्रबार राति स्पेनलाई जित दिलाउन अल्भारो मोराटाले ह्याट्रिक पूरा गर्दा डानी ओल्मो, निको विलियम्स र लामिने यामलले एक-एक गोल गरे । जर्जियाका सोलोमोन भिर्कभेलियाले एक आत्मघाती गोल गरे ।
यामल स्पेनका लागि गोल गर्ने सबैभन्दा कान्छा खेलाडी बनेका छन् । स्पेनका लागि गोल गर्दा यामल १६ वर्ष ५७ दिनमात्र पुगेका थिए । यसअघि गाभीले स्पेनका लागि १७ वर्ष ६२ दिनको उमेरमा गोल गरेका थिए ।
जर्जियाका जियोर्जी चाक्भेटाजले एक गोल फर्काए ।
अन्य खेलमा स्कटल्यान्डले सायप्रसलाई ३-०, पोर्चुगलले स्लोभाकियालाई १-०, क्रोएसियाले ५-० तथा बोस्निया हर्जगोभिनाले लिचेस्टाइनलाई २-१ ले पराजित गर्‍यो ।
