लगातार ११ औँ खेलमा अपराजित मेस्सीको मियामी
काठमाडौँ- अर्जेन्टिनी फुटबल स्टार लियोनल मेस्सीआबद्ध इन्टर मियामीले लगातार ११ औँ खेलमा अपराजित यात्रा कायमा गरेको छ ।
अमेरिकी क्लब इन्टर मियामीले लस एन्जलस एफसीलाई पराजित गर्दै ११ औँ खेलसम्म अपराजित रहन सफल भएको हो ।
मेजर सकर लिगअन्तर्गत लस एन्जलसको बीएमओ स्टेडियममा सोमबार बिहान भएको खेलमा मियामीले लस एन्जलस एफसीलाई ३-१ ले पराजित गर्यो ।
फाकुन्डो फरियासले खेलको १४ औँ मिनेटमा गोल गर्दै मियामीलाई सुरुवाती अग्रता दिलाएका थिए ।
खेलको ५१ औँ मिनेटमा मेस्सीको असिस्टमा जोर्डी अल्बाले गोल गर्दै मियामीको अग्रता दोब्बर बनाए ।
मेस्सीकै असिस्टमा लियोनार्डो कम्पानाले खेलको ८६ औँ मिनेटमा टिमका लागि तेस्रो गोल गरे ।
तर ९० औँ मिनेटमा रायन होलिङ्सहेडले लस एन्जलसका लागि एक गोल फर्काए पनि टिमको हार टार्न भने सकेनन् ।
यस जितसँगै मियामी लिग तालिकको १४ औँ स्थानमा एथावत छ । उसको २५ खेलमा २५ अंक नै रहेको छ ।
मियामीले अब आइतबार बिहान स्पोर्टिङ कन्सास सिटीसँग खेल्ने तालिका रहेको छ । मेस्सीले मियामीको त्यो खेल गुमाउने छन् । उनले अर्जेन्टिनाका लागि फिफा विश्वकप छनोट खेल्न मियामीको उक्त खेल गुमाउन लागेका हुन् ।
