काठमाडौँ–नेकपा एमालेका सांसद सूर्य थापाले जिल्ला निर्वाचन कार्यालयलाई सिडियो कार्यालय अन्तर्गत राखिने निर्णयको विरोध जनाउँदै सभामुखको रुलिङको माग गरेका छन् । मंगलबार प्रतिनिधिसभा बैठकको विशेष समयमा बोल्दै उनले यस्तो माग राखेको हुन् । 

‘लोकतन्त्रमा निर्वाचनको निष्पक्षताको जुन महत्व हुन्छ । यो कुरालाई आत्मसाथ नगरेसम्म अरु कुरा गर्नु भनेको यो बेकारको कुरा हुन्छ,’ उनले भने, ‘यो बेकारको कुरामा सदनले लगाम लगाउनुपर्छ । निर्वाचनलाई निष्पक्ष गराउने कुराको प्रत्याभुति हामीले छुट्टै निर्वाचन आयोगको व्यवस्था संविधान बमोजिम गरेका छौँ । त्यस अन्तर्गत नै देशभर निर्वाचन सँग सम्बन्धित कामहरूलाई छुट्टै कार्यालय स्वतन्त्र रुपमा गर्ने निर्वाचनका कामलाई सिडियो कार्यालयको छाँयाका रुपान्तरण काम नगरियोस् ।’

उनले अगाडि भने, ‘यो विषयमा सभामुखको ज्यूको रुलिङ चाहिन्छ । अर्थमन्त्री ज्यूले यसमा स्पष्ट पार्नुपर्छ । खारेज गर्नुपर्छ । तब मात्रै कारबाही अगाडि बढ्छ ।’ यस विषयमा बैठकको राष्ट्रिय स्वतन्त्र पार्टीका सांसदहरूले सुरुमै उठेर विरोध जनाएका थिए ।