काठमाडौँ- प्रधानमन्त्री तथा नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ ले पूर्वमन्त्री एवं माओवादी केन्द्रका नेता पोष्टबहादुर बोगटीको बाटो पहिल्याउँदै उनको विचार र सिद्धान्तलाई आत्मसात गर्दै अगाडि बढ्न निर्देशन दिएका छन् । 

शनिबार बिहान पेरिसडाँडामा पोष्टबहादुर बोगटी स्मृति प्रतिष्ठानको आठौँ वार्षिक साधारण सभा तथा स्मृति दिवस कार्यक्रमलाई सम्बोधन गर्दै प्रधानमन्त्रीले आफ्ना नेता कार्यकर्ताहरूलाई उक्त निर्देशन दिएका हुन् ।

कार्यक्रममा प्रधानमन्त्रीले भने, 'पोष्टबहादुर बोगटी, आफूलाई राष्ट्र निर्माणको लागि, पार्टी निर्माणको लागि जेतिबेला अफ्ट्यारो र असहज भएको बेलामा उहाँलाई सम्झँदै सबै जना पोष्टबहादुर बोगटीकै बाटो पहिल्याउँदै उहाँको विचार र सिद्धान्तलाई आत्मसात गर्दै अगाडि बढौँ ।'

साथै साधारण सभामा विशिष्ट अतिथि, अतिथिहरूले पोष्टबहादुर बोगटीबाट सिक्दै जानुपर्ने बताए ।

उनले भने, 'पोष्टबहादुर बोगटी एक जना इमान्दार नेता हुनुहुन्थ्यो, यहाँको सम्पूर्ण जीवन त्याग र निष्ठाले भरिपूर्ण छ। उहाँ एक जना सहयोगी भावनाको, आफ्नो जिम्मेवारीप्रति प्रतिवद्ध, सक्षम र समन्वयकारी नेता हुनुहुन्थ्यो ।'

बोगटीको निधनपछि पार्टीमा समन्वयको अभाव महसुस हुने गरेको प्रधानमन्त्रीले स्मरण गरे । उनले भने, ‘अप्ठ्यारो परेको बेला उहाँले समन्वय गर्नुहुन्थ्यो । पार्टीमा उहाँको अभाव खड्किरहन्छ ।’

साथै प्रमुख अतिथिका रूपमा रहेका प्रचण्डले सभालाई पानसमा बत्ती बालेर उद्घाटन गर्दै दिवङ्गत नेता श्रद्धेय पोष्टबहादुर बोगटीको तस्बिरमा अबिर माला लगाई श्रद्धाञ्जली अर्पण गरेका थिए ।

त्यसैगरी साधारण सभाको उद्घाटन कार्यक्रमलाई समापन गर्नका लागि सभाका अध्यक्ष, प्रतिष्ठानका का.बा. अध्यक्ष तथा राष्ट्रिय सभाका सदस्य कृष्णप्रसाद अधिकारीले पोष्टबहादुर बोगटी पक्ष प्रतिपक्ष केही पनि न भनिकन समग्र नेपाली लोकतान्त्रिक आन्दोलनमा सहभागी सबै दलहरूका लागि सम्मान पात्र भएको बताए ।

'नुवाकोटका सम्पूर्ण किसानहरूमा एउटा नारा बनेको थियो "पोष्टबहादुर बोगटी जनताको ओखती" उनी साँच्चिकै ओखतीको रूपमा उपस्थित हुनुहुन्थ्यो,' उनले भने । 

पोष्टबहादुरले छोडेर गएको शिक्षा, समाज परिवर्तनका लागि महत्वपूर्ण रहेको उनको भनाइ छ । पोष्टबहादुरका गहकिला विचारहरू आगामी पुस्ताहरूले ग्रहण गर्नुपर्ने पनि उनले बताए ।

पूर्व अध्यक्ष हितराज पाण्डेको पालामा पोष्टबहादुर बोगटी स्मृति प्रतिष्ठानको ओआर्क, शालिक र कृषि प्रदर्शनी मेलाका योजनाहरू सम्पन्न भएको पनि अधिकारीले जिकिर गरे । उनले भने, 'गत साल प्रतिष्ठानकै नाममा राष्ट्रिय खेलकुद भलिबल सम्पन्न गरेका थियौँ र आगामी प्रतिष्ठानको नाममा जग्गाको व्यवस्थापन गर्ने तथा योजनाहरू निर्माण लगायतका कामहरू गर्नको लागि यो आठौँ साधारण सभा गर्दैछौं ।'

यस्तै उनले कार्यक्रममा अमूल्य समय दिने प्रधानमन्त्री पुष्पकमल दाहाल 'प्रचण्ड' विशिष्ट अतिथि तथा अतिथिहरू, कार्यक्रममा सहभागी प्रतिनिधि तथा प्रदेश सभाका सदस्यहरू, पार्टीका केन्द्रीय सदस्यहरू, प्रतिष्ठानका सम्पूर्ण व्यक्तिहरू, व्यव​स्थापन गर्ने व्यवस्थापक साथै पत्रकारहरूलाई हार्दिक धन्यवाद ज्ञापन गर्दै आठौँ साधारण सभाको समापन गरेका थिए ।