एमालेले भन्यो : सरकारको जवाफ सुन्न तयार छौं, चित्त बुझ्दो नभए संसद् अगाडि बढ्न दिँदैनौँ
काठमाडौँ– प्रमुख प्रतिपक्षी दल नेकपा एमाले सुन तस्करी प्रकरणमा संसदमा सरकारको जवाफ सुन्न तयार भएको छ । एमालेका सचेतक महेश बर्तौलाले यस प्रकरणमा संसदमा सरकारलाई जवाफको मौका दिने पार्टीले निर्णय गरेको बताए ।
तर, जवाफ चित्त बुझ्दो नभए पनि संसद् अगाडि बढ्न नदिने उनले उल्लेख गरे । ‘यस प्रकरणमा प्रधानमन्त्री बोल्नुहुन्छ कि गृहमन्त्री, जसले बोले पनि जवाफ चित्त बुझ्दो हुनुपर्छ,’ उनले भने, ‘जवाफ चित्त बुझ्दो नभए संसद् चल्न दिने नदिने त्यसपछि निर्णय गर्छौं ।’
सदन खुलाउन सत्तापक्ष र प्रतिपक्षका शीर्ष नेतासहित तीन दलका प्रमुख सचेतक मंगलबार बिहान बैठक बसेको थियो । तर, बैठकबाट कुनै निष्कर्ष निस्कन सकेन ।
प्रतिनिधि सभा बैठक मंगलबार ३ बजे बस्ने कार्यसूची रहेकाे छ । सुन तस्करी प्रकरणमा एमालेले अनुसन्धानका लागि उच्च स्तरीय छानबिन समिति बनाउन माग गर्दै करिब दुई सातादेखि बैठक अवरोध गरिरहेको छ ।
