काठमाडौँ- अस्ट्रेलियन क्रिकेट टिमका ब्याट्सम्यानले दुर्लभ कीर्तिमान कायम गरेका छन् । आईसीसीले सार्वजनिक गरेको नयाँ वरीयताअनुसार टेस्ट क्रिकेटको ब्याटिङतर्फ शीर्ष तीनमा अस्ट्रेलियन ब्याट्सम्यान रहेका छन् ।

वरीयताअनुसार अस्ट्रेलियाका मार्नस लाबुसेन शीर्ष, स्टिभ स्मिथ दोस्रो तथा ट्राभिस हेड तेस्रो स्थानमा रहेका छन् । आईसीसी विश्व टेस्ट च्याम्पियनसीपको फाइनलमा भारतविरुद्ध गरेको प्रदर्शनपछि उनीहरु शीर्ष तीन स्थानमा अटाएका हुन् ।

यसअघि टेस्टको ब्याटिङतर्फ शीर्ष तीनमा पर्ने खेलाडी वेस्ट इन्डिजका रहेका थिए । सन् १९८४ मा वेस्ट इन्डिजका गोर्डोन ग्रिनिज, क्लिभ ललोयड र ल्यारी गोमेस वरीयताको शीर्ष तीनमा रहेका थिए ।