सेमिफाइनलमा नेपाललाई हराएको मलेसिया फाइनलमा पराजित
काठमाडौँ- आयोजक मलेसियालाई पराजित गर्दै युनाइटेड अरब इमिरेट्स (यूएई) एसीसी महिला प्रिमियर कप टी-ट्वान्टी क्रिकेट प्रतियोगिताको उपाधि जितेको छ ।
क्वालालम्पुरस्थित बायुमास ओभलमा आइतबार भएको फाइनलमा यूएईले मलेसियालाई ३७ रनले पराजित गरेको हो ।
उपाधिका लागि १ सय ६ रनको लक्ष्य पछ्याएको मलेसियाले निर्धारित २० ओभरमा ९ विकेट गुमाएर ६८ रनमात्र बनाउन सक्यो ।
मलेसियाका लागि नुर दानियाले १६ रन तथा एल्सा हन्टरले १५ रन बनाए । यूएईका लागि हिना होचानडानी र वैष्णव महेशले समान २-२ विकेट हात पारे ।
यसअघि पहिले ब्याटिङ गरेको यूएईले भने निर्धारित २० ओभरमा ३ विकेट गुमाएर १ सय ५ रन बनायो । यूएईका लागि कप्तान इशा ओजाले ५३ रन तथा कविशा इगोदेजले ३० रन जोडे ।
यसअघि सेमिफाइनलमा भने मलेसियाले नेपाललाई ४ विकेटले पराजित गर्दै फाइनलको यात्रा तय गर्नुका साथै एसीसी महिला एसिया कपमा पनि स्थान सुरक्षित गरेको थियो ।
