काठमाडौँ- तीन खेलको टी-ट्वान्टी सिरिजको अन्तिम खेलमा पाहुना टोली वेस्ट इन्डिजले अस्ट्रेलियामाथि जित हात पारेको छ ।

मंगलबार पर्थमा भएको खेलमा वेस्ट इन्डिजले घरेलु टोली अस्ट्रेलियालाई ३७ रनले पराजित गरेको हो । यससँगै अस्ट्रेलियाले सिरिज २-१ ले जितेको छ । अस्ट्रेलियाले यसअघिका दुवै खेल जितेको थियो ।

मंगलबारको खेलमा २ सय २१ रनको लक्ष्य पछ्याएको अस्ट्रेलियाले निर्धारित २० ओभरमा ५ विकेट गुमाएर १ सय ८३ रनमात्र बनाउन सक्यो ।

अस्ट्रेलियाका लागि डेभिड वार्नरले ४९ बलमा ९ चौका र ३ छक्काको मदतमा ८१ रन बनाए पनि जितका लागि पर्याप्त भएन । टिम डेभिडले ४१ रन जोडे ।

वेस्ट इन्डिजका लागि रोमारियो शेफर्ड र रोस्टन चेजले २-२ विकेट हात पारे ।

यसअघि टस जितेर पहिले ब्याटिङ गरेको वेस्ट इन्डिजले निर्धारित २० ओभरमा ६ विकेट गुमाएर २ सय २० रन बनाउँदा आन्द्रे रसेलले ७१ रन तथा शेर्फान रुदरफोर्डले ६७ रनको योगदान गरे ।

अस्ट्रेलियाका लागि जाभियर बार्टलेटले सर्वाधिक २ विकेट लिए ।