सूर्य तामाङले ह्याट्रिकसहित ६ विकेट लिएपछि मधेशमाथि बागमतीको सानदार जित
काठमाडौँ- सूर्य तामाङले ह्याट्रिकसहित ६ विकेट हात पारेपछि पीएम कप पुरुष राष्ट्रिय क्रिकेट प्रतियोगितामा बागमती प्रदेशले मधेश प्रदेशमाथि सानदार जित हात पारेको छ ।
काठमाडौँको मूलपानी क्रिकेट मैदानमा मंगलबार भएको खेलमा बागमतीले मधेशलाई ८६ रनले पराजित गरेको हो ।
१ सय ९१ रनको सामान्य लक्ष्य पछ्याएको मधेशले २९ ओभरमा सबै विकेट गुमाएर १ सय ४ रनमात्र बनाउन सक्यो ।
मधेशको इनिङ्स धराशायी बनाउन बागमतीका सूर्य तामाङले उत्कृष्ट बलिङ गरे । उनले २९ औँ ओभरमा ह्याट्रिक पूरा गर्नुका साथै ४ विकेट हात पारेका थिए ।
सूर्यले २९ औँ ओभरको पहिलो बलमा रुपेश सिंह, दोस्रो बलमा राजेश यादव तथा तेस्रो बलमा सम्सद अन्सारीको विकेट लिँदै ह्याट्रिक पूरा गरे र अन्तिम बलमा रंजित कुमारलाई आउट पारे ।
सूर्यले ९ ओभर बलिङ गर्दा ३ मेडल ओभर फाल्दै केवल १८ रन खर्चिए । बागमतीका प्रतिश जिसी र इशान पाण्डेले समान २-२ विकेट हात पारे ।
मधेशका लागि पवन सर्राफले सर्वाधिक ४५ तथा मयक यादवले ३१ रन बनाए ।
यसअघि टस हारेर पहिले ब्याटिङ गरेको बागमतीले ४९ ओभर २ बलमा सबै विकेट गुमाएर १ सय ९० रन बनाउँदा प्रतिश जिसीले ५९ रन जोडे ।
मधेशका अरनिको यादव र रुपेश सिंहले समान २-२ विकेट हात पारे ।
