काठमाडौँ - नेकपा एमालेका अध्यक्ष केपी ओलीले एमालेलाई कमजोर पार्न गुट उपगुट सिर्जना गर्ने प्रयास भइरहेको बताएका छन् । 

बुधबार विराटनगरमा आयोजना गरिएको एमाले कोशी प्रदेश समितिका निर्वाचित पदाधिकारिहरुको शपथ ग्रहण कार्यक्रमलाई सम्बोधन गर्दै ओलीले पार्टीलाई कमजोर पार्न पार्टी भित्र हुँदै नभएको गुट उपगुट सिर्जना गर्ने प्रयास भइरहेको र हौवा फैलाउने कार्य भइरहेको बताएका हुन् । 

एमालेलाई विभाजन गराउन पार्टी भित्र दरार पैदा गर्न अहिले पनि देशी विदेशी शक्तिहरू लागिपरेकोले यसतर्फ सचेत भएर हिँड्न नेता कार्यकर्ताहरूलाई उनले निर्देशन दिए । उनले नेकपा एमालेको भिजन सुखी नेपाली र समृद्ध नेपाल निर्माण गर्ने र सवै क्षेत्रमा विकास गर्नुका साथै गरिवी निवारण गर्ने उद्देश्य रहेको धारणा राखे । 

अध्यक्ष ओलीले लोकतान्त्रिक पार्टीमा आपसमा स्वस्थ प्रतिस्पर्धा हुनु र निर्वाचित हुनुलाई सामान्य ढंगले बुझ्न आग्रह गरे । कार्यक्रममा एमाले कोशी प्रदेश कमिटीमा निर्वाचित अध्यक्ष, पदाधिकारी तथा सदस्यहरूले पद तथा गोपनीयताको शपथ लिएका थिए ।