काठमाडौँ–राष्ट्रिय स्वतन्त्र पार्टीको शनिबार बसेको केन्द्रीय कार्यसम्पादन समितिकाे बैठकले नेपालमा ऊर्जा क्षेत्रको अध्ययन गर्न कार्यदल गठन गरेको छ । ऊर्जा तथा भूमिगत संरचना विज्ञ ई श्रीराम न्यौपानेको संयोजकत्वमा  ३ सदस्य कार्यदल गठन गरेको रास्वपाले जनाएको छ ।

कार्यदलले नेपाल ऊर्जा क्षेत्रको विस्तृत अध्ययन गरी पार्टीको तर्फबाट ऊर्जा नीति, योजना र मार्ग चित्र तयार गरी केन्द्रीय समितिलाई पेश गर्ने बताइएको छ । संयोजक न्यौपाने सहित कार्यलदमा नेपाल सरकारका पूर्व सचिव तथा ऊर्जा विज्ञ ई. देबेन्द्र कार्की,  र ऊर्जा विज्ञ ई. डा. सरोज अधिकारी रहेका छन् । 

यस्तै बैठकले निजामती सेवा विधेयक तथा नेपालको सार्वजनिक प्रशासनका भएका, हुनुपर्ने तथा गरिनुपर्ने व्यवस्थाका सम्बन्धमा अध्ययन गरी प्रतिवेदन पेश गर्न नेपाल सरकारका पूर्व सचिव शारदा प्रसाद त्रितालसहित ५ जनाको अर्को कार्यदल गठन गरेको छ ।

यस कार्यदलमा पूर्व सचिव त्रितालसहित पूर्व सचिव पूर्णचन्द्र भट्टराई, सहसचिव भागवत खनाल, पूर्व प्रशासक तथा अधिवक्ता कृष्णप्रसाद अधिकारी र चार्टर्ड एकाउन्टेन्ट एवम् पूर्व प्रशासक लिलाराज ढकाल रहेका छन् ।