भरतपुर- नेपाली कांग्रेसले चितवनमा शनिबारदेखि संगठन विस्तारको अभियान सुरु गर्दैछ । पार्टीको केन्द्रीय समितिको निर्णय अनुसार ४२औं विपी जयन्तीको अवसर पारेर सदस्यता वितरणको अभियान सुरु गर्न लागेको हो ।

शनिबार विहान ११ बजे एकै साथ विपीको फोटोमा माल्यार्पण गरेर सदस्यता वितरण सुरुवात गरिने बताइएको छ । कांग्रेसको क्रियाशील सदस्यता नवीकरण सम्बन्धी ९८ वटै वडा कार्यसमितिलाई गरिएको कांग्रेस चितवनका सचिव धुव्रराज पोखरेलले बताए । सदस्यता वितरण र क्रियाशील सदस्यता नवीकरणलाई प्रभावकारी र व्यवस्थित गर्न निर्देशन गरिएको पोखरेलले बताए ।

सदस्यताको फारम वडा तहमा पुगिसकेको छ । यसपटक जिल्ला प्रतिनिधिको रोहवरमा मात्रै नवीकरण गर्ने नियम राखिएको छ । नवीकरण सकेपछि साउन २० गते सबै वडाले वडा सम्मेलन गर्नेछन् ।

योग्यता पुगेका नेपाली नागरिकले अनलाइनबाटै सदस्यता लिन सक्नेछन् । सदस्यता लिएको एक वर्षपछि मात्रै क्रियाशील सदस्यता पाउने प्रावधान गरिएको छ । क्रियाशील सदस्यता नवीकरण भने दुई वर्षको एकैपटक गर्नुपर्ने नियम राखिएको छ ।