समाजवादी शक्तिहरूलाई एकताबद्ध गर्न समाजवादी मोर्चा : माधव नेपाल
असार ३, २०८०
काठमाडौँ- नेकपा एकीकृत समाजवादीका अध्यक्ष माधवकुमार नेपालले समाजवादी शक्तिहरूलाई एकताबद्ध गर्नका लागि समाजवादी मोर्चा बनाउन खोजिएको बताएका छन् ।
आइतबार संसद् भवन नयाँ बानेश्वरमा सञ्चारकर्मीसँग कुरा गर्दै अध्यक्ष नेपालले निश्चित विचार मिल्ने समाजवादी शक्तिहरू एक हुनु स्वाभाविक रहेको भन्दै समाजवादी शक्तिहरूलाई एकीकृत गर्न मोर्चा बनाउन खोजिएको बताए । उनले समाजवादी मोर्चाका कारण कोही पनि डराउनुपर्ने अवस्था नरहेको भन्दै मोर्चामा आगामी दिनमा अन्य दललाई पनि गोलबन्द बनाउने धारणा राखे ।
राम्रो उद्देश्यका लागि एक ठाउँ आउँदा विरोध गर्नुपर्ने कुनै कारण नभएको उनको भनाइ छ । माओवादी केन्द्र, नेकपा समाजवादी लगायतका दलले सोमबार समाजवादी मोर्चा घोषणा गर्दै छन् ।
