मियामीद्वारा २० हजार दर्शकसामू मेस्सी सार्वजनिक
साउन १, २०८०
काठमाडौँ- इन्टर मियामीले विशेष कार्यक्रमकाबीच अर्जेन्टिनी स्टार फुटबलर लियोनल मेस्सीलाई नयाँ खेलाडीको रूपमा सार्वजनिक गरेको छ ।
मियामीको डीभीआर पीएनके स्टेडियममा आइतबार आयोजित भव्य कार्यक्रममा सात पटकका बालोन डी'ओर विजेतालाई सार्वजनिक गरिएको थियो ।
करिब २ घण्टा ढिलो गरी सुरु भएको कार्यक्रममा मेस्सीको झल्को पाउन करिब २० हजार दर्शकले मुसलधारे पानी र चट्याङको वेवास्ता गरेका थिए ।
विश्वकप विजेता मेस्सीले सन् २०२५ को अन्त्यसम्म मेजर लिग सकर (एमएलएस) क्लब मियामीबाट खेल्नेछन् ।
मियामीमा मेस्सीले बार्सिलोनामा सँगै खेलेका डिफेन्सिभ मिडफिल्डर सर्जियो बुस्केट्ससँगै खेल्नेछन् । बुस्केट्सले पनि मियामीमा २०२५ सम्म खेल्ने सम्झौतापत्रमा हस्ताक्षर गरिसकेका छन् ।
बार्सिलोनाका पूर्व कप्तानलाई पनि आइतबार राति सोही कार्यक्रममा औपचारिक रूपमा सार्वजनिक गरिएको थियो ।
