काठमाडौँ - नेकपा(एकीकृत समाजवादी)का अध्यक्ष माधवकुमार नेपालले प्रदेश सरकारहरूको नेतृत्वमा आलोपालो हुने बताएका छन् । शुक्रबार समाजवादी प्रेस संगठन नेपाल धनुषाले आयोजना गरेको पत्रकार सम्मेलनमा बोल्दै अध्यक्ष नेपालले प्रदेश सरकारहरूको नेतृत्वमा दलहरूबीच आलोपालो हुने बताएका हुन् । प्रदेश सरकारहरू धमाधम परिवर्तन हुन थालेका भन्दै एकीकृत समाजवादी पनि प्रदेश सरकारमा सामेल हुने उनको भनाइ छ । 

उनले जनमत नै मिलेर सरकार बनाउने रहेको उल्लेख गर्दै पार्टीको संख्यात्मक कुरालाई ध्यानमा राखी गठबन्धनका दलहरूबीच बाँडफाँट हुने बताए । कुनै एक दलको बहुमत नरहेकाले सरकार निर्माणमा अन्य पार्टीको भावनालाई पनि ध्यान दिनुपर्ने बताए । 

‘कसैकसैले आलोपालो गर्नु हुँदैन । यो कहीँ सम्भव छ ? यो कुरा उठाउने मान्छेले पनि मौका पाएको भए छोड्थ्यो ?,' उनले भने, 'जब जनताले नै तपाईहरू मिलेर गर भनिसकेपछि कुनै एउटा पार्टीको बहुमत नहुँदा गर्छन् के ? हाम्रो पार्टी प्रदेश सरकारहरूमा सहभागी हुनेछ । कसरी हुन्छ ? कतिजना हुन्छ ? भन्ने कुराहरू बसेर छलफल भइसकेपछि टुंगो लाग्नेछ ।’

अध्यक्ष नेपालले समाजवादमा प्रतिवद्ध हुने पार्टीहरूबीच समाजवादी मोर्चा बनाउने तयारी रहेको बताए । नेकपा(माओवादी केन्द्र), नेकपा(एकीकृत समाजवादी) र जसपा एकतावद्ध हुने कुरा पनि भइरहेको उनको भनाइ छ । उनले विप्लव नेतृत्वको नेपाल कम्युनिस्ट पार्टी लगायतका अन्य पार्टीहरूसँग पनि मोर्चा बनाउने विषयमा छलफल भइरहेको बताए । 

उनले एकीकृत समाजवादी एमाले वा अन्य कुनै पार्टीहरू सँग विलय भने नहुने स्पष्ट पारे। आफूहरू समानताको सिद्धान्तको आधारमा र वैचारिक एकरूपताको आधारमा जोसँग पनि हातेमालो गर्दै अघि बढ्ने उनको भनाइ छ ।