अफगानिस्तानबाट ध्वजावाहक जहाजमा नेपाली ल्याउन सक्ने अवस्था छैन : गृहमन्त्री खाण

काठमाडौँ - गृहमन्त्री बालकृष्ण खाणले अफगानिस्तानमा रहेका नेपाली लिन तत्काल नेपाली ध्वजावाहक जहाज जान सक्ने अवस्था नरहेको स्पष्ट पारेका छन् । बुधबार कानून, न्याय तथा मानव अधिकार समितिले अफगानिस्तानमा रहेका नेपालीको मानव अधिकारको स्थिति, सुरक्षा र उद्धार सम्बन्धमा सरकारसँग गरेको छलफलमा मन्त्री खाणले यस्तो बताएका हुन् । ‘नेपाली ध्वजावाहक जहाज पठाउन सरकार तयार रहे पनि काबुलमा जान सक्ने अवस्था छैन,’ उनले भने । 

अफगानिस्तानका विभिन्न क्षेत्रमा रहेका नेपालीहरुको तथ्यांक संकलन गर्ने काम भइरहेको र कति नेपाली आउन बाँकी छन् भन्नेमा सरकार निरन्तर संवादमा रहेको मन्त्री खाँणको भनाइ छ ।  उनले अन्य माध्यमबाट छिमेकी मुलुकहुँदै नेपालीलाई ल्याउने पूर्वतयारी गरेको पनि जानकारी दिए । अफगानिस्तानको घटनामा नेपाल तटस्थ रुपमा उभिएको गृहमन्त्रीले बताए ।

---