सचिव मरासिनीले भने : रासायनिक मलको वितरणमा उद्योग मन्त्रालयको कुनै भूमिका छैन

काठमाडौँ- उद्योग, वाणिज्य तथा आपूर्ति मन्त्रालयका सचिव मधुकुमार मरासिनीले रासायनिक मलको वितरणमा आपूर्ति मन्त्रालयको कुनै भूमिका नभएको बताएका छन् । सोमबार बसेको अर्थसमिति बैठकमा बोल्दै सचिव मरासिनीले यस्तो बताएका हुन् ।

उनले मन्त्रालय मातहतमा रहेको साल्ट ट्रेडिङले नेपालमा आयात हुने मध्ये ३० प्रतिशत आयात गर्ने नीति अनुसार मल आयात गर्ने गरेको जिकिर गरे । कृषि मन्त्रालयको समितिले नै कुन प्रदेशलाई कति मल पठाउने निर्णय गर्ने उनले बताए ।

---

सचिव मरासिनीले भारतबाट जिटुजीमार्फत पेट्रोलियम पदार्थ जस्तो रासायनिक मल खरिद गर्न सम्भव नभएको उल्लेख गरे । उनले भारतले पनि बाहिरबाट नै रासायनिक मल आयात गर्ने गरेको बताए । उनले मल कारखाना स्थापना गर्ने जिम्मेवारी पनि उद्योग मन्त्रालयको नभएको बताए । उनले उद्योग मन्त्रालयले रासायनिकभन्दा पनि प्राङ्गारिक मलमा जोड दिने वा रैथाने बालीहरू कोदो, फापर, मकैमा जोड दिने नीति रहेको उल्लेख गरे ।

मरासिनीले भारतले चामल निकासीमा प्रतिबन्ध लगाएको बताए । भारतले चामल निकासीमा प्रतिबन्ध लगाउँदा नेपाली बजारमा मूल्य बढ्न सुरु भएको उनकाे भनाइ छ । उनले नेपालीहरूको खानपान बानी व्यवहारमा परिवर्तन गर्नु आवश्यक रहेको बताए ।