सुनवलमा पशु सेवा केन्द्र सञ्चालन

 नवलपरासीको सुनवल-२ मा रु डेढ करोड लागतमा निर्माण गरिएको पशु अस्पताल सञ्चालनमा आएको छ ।

आज आयोजित कार्यक्रममा सुनवल नगरप्रमुख विमला अर्यालले पशु सेवा केन्द्रको उद्घाटन गरिन्। उनले सेवा केन्द्र सञ्चालनमा ढिलाइ भए पनि अब सेवा प्रवाहमा कुनै कमी आउन नदिने गरी काम हुने बताइन् । 

---

पशु सेवा केन्द्रमा आउने गाई, भैँसी, बाख्रालगायत जनावरलाई पशुविज्ञ डाक्टरद्वारा निःशुल्क औषधोपचार गर्ने बताइन् ।

पशु सेवा सञ्चालनमा आएपछि यस क्षेत्रका गाई भैँसी, बाख्रालगायत चौपायाको उपचारमा सहज हुने र पशुविज्ञ चिकित्सकद्वारा निःशुल्क औषधोपचार हुने जनाइएको छ ।

संघीय सरकार र वडा कार्यालयको संयुक्त लगानीमा निर्माण भएको केन्द्र सञ्चालनमा आएपछि स्थानीय पशुपालक किसान निकै लाभान्वित हुने अपेक्षा गरिएको सुनवल–२ का वडाध्यक्ष राजेन्द्र यादवको भनाइ छ । यहाँ विसं २०७८ मा पशु सेवा केन्द्र भवन निर्माण सुरु भएको थियो । 

नेपाल लाइभ स्टक सेक्टर इनोभेसन आयोजना तथा हरिहर भवन ललितपुरको आर्थिक सहयोगमा एसियाटिक वसन्त जेभीले भवन निर्माण गरेको हो । पशु सेवा केन्द्रको काम सम्पन्न गरेर २०७९ सालमा सुनवल नगरपालिकालाई हस्तान्तरण गरिएको थियो ।

सेवा केन्द्र सञ्चालनमा आएसँगै पशुको उपचारमा सहज हुने आशा जागेको स्थानीय हीरालाल यादवले बताए । पशु चौपाया बिरामी हुँदा अब समयमै उपचार पाउनेमा आफूहरू विश्वस्त भएको स्थानीय जितबहादुर पौडेलले आशा व्यक्त गरे ।