पुष्प र वर्षाको ‘मनसँग मन’ पनि नयाँ वर्षमा रिलिज नहुने

काठमाडौं  :  त्यसो त ‘मनसँग मन’ले चैत २७ मा रिलिज गर्ने गरी एउटा पनि गतिविधी गरेको थिएन । धेरै पहिला एउटा गीत निस्किएको थियो जसमा प्रदर्शन मिति तोकिएको थिएन । त्योबाहेक न पोस्टर निस्किएको थियो न टे«लर । तर, पनि ‘मनसँग मन’ले चैत २७ मा फिल्म प्रदर्शन नहुने घोषणा गरेको छ । 

यसअघि यही मितिमा प्रदर्शन हुने भनी टेलरसमेत सार्वजनिक भइसकेको ‘लप्पन छप्पन २’ पनि निर्धारित मितिमा रिलिज नहुने बताइएको थियो ।
निर्माण टिमले सोमबार एउटा सूचना जारी गर्दै फिल्मको प्रदर्शन पोस्टपोन्ड गरिएको जनाएको हो । 

---

कोरोनाको केस बढ्न थालेपछि स्वास्थ्य मन्त्रालयले भिडभाड नगर्न आग्रह गरिसकेको छ । सरकारले हलमा लागू गरेको ५० प्रतिशत अकुपेन्सी पनि हटाएको छैन । यसैले, चैत्र २७ गतेलाई तोकिएको चलचित्रको प्रदर्शन मिति स्थगित गरिएको निर्माणपक्षले बताएको छ । चलचित्रको नयाँ मितिका लागि वितरकसँग सल्लाह भइरहेको निर्माण टिमले जनाएको छ । 

चलचित्रको प्रदर्शन मिति पछि सारिए तापनि यसको फस्टलुक भने सार्वजनिक गरिएको छ । चलचित्रको फस्टलुकमा मुख्य कलाकार नायक पुष्प खड्का र नायिका वर्षा सिवाकोटीलाई रोमान्टिक मुडमा देखाइएको छ ।

यो चलचित्रमा वुद्धि तामाङ, चाँदनी प्रधान, महेन्द्र बागदास, सन्ते दाको पनि मुख्य भूमिका छ । साथमा, चलचित्रको एक गीतमा नायक पल शाह र नायिका  पूजा शर्माले नृत्य गरेका छन् ।

चलचित्रमा कैलाश राइको निर्देशन, अरुण तामाङको लगानी छ । चलचित्रमा सौरभ लामाको छायांकन, अर्जुन जीसीको सम्पादन, अर्जुन पोखरेल, दीपक शर्मा र अगोम गुरुङको संगीत, कमल राई र रामजी लामिछानेको नृत्य निर्देशन र सन्तोष खवासको एक्सन छ ।