कला

७२ घण्टामा खिचिएको सन्दीपको ‘श्री’ शुक्रबारबाट देशभरका हलमा

इकागज |
चैत २५, २०७७ बुधवार ११:५८ बजे

काठमाडौं :  नेपाली चलचित्र इतिहासमै सबैभन्दा कम समय अर्थात् जम्मा ७२ घण्टामा छायांकन सकिएको फिल्म  ‘श्री’ यही शुक्रबार अर्थात् २७ चैत्रदेखि देशभरका हलमा प्रदर्शन हुने भएको छ ।

 लकडाउनको बेलामा निर्देशक एभरेष्ट सूर्य बोहराले आफ्नै निर्माण र निर्देशनमा तयार पारेको ‘श्री’ बारे मंगलबार राजधानीको सिडिसी सिनेमामा पत्रकार सम्मेलन गरि जानकारी दिइयो । 


नयाँं वर्षको अबसर पारेर दर्शकमाझ आउन लागेको ‘श्री’ मा सन्दिप क्षेत्री, बर्षा शिवाकोटी, बुद्धि तामाङ, राजाराम पौडेल,बसुन्धरा भुसाल, रबिन्द्र झा, भोला सापकोटा, कमलजंग बोहरा (काजी), मोहनकृष्ण श्रेष्ठ,सविता गुरुङ,नवीन श्रेष्ठ, श्यामसुन्दर पुडासैनी र बालकलाकार न्यासिका कार्कीले अभिनय गरेका छन् ।

पहिला केही ओटिटीमा मात्रै रिलिज गर्ने तयारी गरिएको भए तापनि ट्रेलर हेरेपछि भने यो फिल्म हलमै प्रदर्शन गर्नुपर्छ भन्ने लागेर आफैले पहल गरेको वितरक करण श्रेष्ठले जानकारी दिए ।

कार्यक्रममा बोल्दै उनले आफूले अमेरिकामा रहेका निर्देशक बोहरालाई सम्पर्क गरि हलमै प्रदर्शन गर्ने जिम्मेवारी लिएको बताए । ‘ट्रेलर एकदमै राम्रो लाग्यो । त्यसपछि मैले निर्देशक सूर्य दाईलाई सम्पर्क गरेर यो फिल्म त हलमै प्रदर्शन गर्नुपर्छ ।

त्यसको सबै चाँजोपाँचो म मिलाउछु भनेर अनुरोध गरेँं,’ करणले भने, ‘दाइ पनि आफ्नो फिल्म हलमा आओस् भन्ने पक्षमा हुनुहुन्छ । कोरोनाका कारण थला परेको चलचित्र उद्योगको श्रीबृद्धिमा ‘श्री’ ले ठूलो योगदान गर्ने बिश्वास मैले लिएको छु ।’

‘श्री’ का प्रमुख पात्र सन्दिप क्षेत्रीले यो फिल्म आफ्ना लागि निकै महत्वपूर्ण रहेको बताए । उनले निर्देशक बोहराले आफूलाई कमेडीबाहेकको भूमिकामा समेत विश्वास गरेर अवसर दिएकोमा धन्यवाद व्यक्त गरे । ‘मैले अहिलेसम्म अभिनय गरेको फिल्महरुमध्ये ‘श्री’ उत्कृष्ट छ ।

मैले मेरा सन्ततीलाई तिम्रो बाबुको फिल्म हो भनेर गर्वका साथ देखाउन सक्छु,’ उनले भने, ‘त्यस्तो विषमपरिस्थितिमा पनि सूर्य दाइले आँट गरेर फिल्म बनाउनु भयो । अहिले यस्तो अबस्थामा करणजीले प्रदर्शन गर्दैहुनुहुन्छ । यसमा मलाई निकै गर्व लागेको छ ।’

उनले सम्पूर्ण चलचित्रप्रेमीलाई हलमै पुगेर ‘श्री’ हेरिदिन आग्रह गरे । अभिनेता भोला सापकोटाले ‘श्री’ मा आफूले निर्वाह गरेको भूमिकाका साथै समग्र फिल्मको चर्चा गरे । उनले विषम परिस्थितिमा समेत हिम्मतका साथ फिल्म निर्माण गरि प्रदर्शन गर्न लागिएकोमा खुशी प्रकट गरे ।

फिल्मकी निर्मात्री तथा अभिनेत्री सविता गुरुङले चलचित्र प्राविधिकहरुलाई राहत स्वरुप ‘श्री’ निर्माण गरिएको स्मरण गर्दै अब यसले हललाई पनि राहत दिने बिश्वास ब्यक्त गरिन् । एभरेष्ट सूर्य बोहरा फिल्मस्को ब्यानर, महारानी इन्टरटेन्मेन्ट युके र ओएसआर डिजिटलको सहकार्यमा निर्माण भएको फिल्मको सरकारले जारी गरेको स्वास्थ्य सुरक्षा मापदण्ड अप्नाइ छायांकन गरिएको थियो ।

कार्यक्रममा फिल्मका सम्वाद लेखन शिवम अधिकारी तथा मुख्य सहायक निर्देशक सुदीप कँुवरले पनि ‘श्री’ निर्माण प्रक्रिया र परिस्थितिको बिस्तार लगाएका थिए ।
सोसियल सस्पेन्स कथामा निर्माण गरिएको फिल्मको निर्माता श्री पराजुली र सविता गुरुङ तथा सहनिर्मातामा यम बराल,सूर्य सिम्खडा (साइराम),बाल शर्मा (टाइगर) र सिन्धु पौडेल गौतम छन् ।फिल्ममा सुजन बडालको सम्पादन र एलिस कार्कीको ब्याकराउन्ड स्कोर छ । ‘श्री’ हलका साथै ओएसआर डिजिटलका बिभिन्न एप्लिकेसनमा समेत प्रदर्शन गरिदैँछ । 
०००


Author

थप समाचार
x