कला

गीत–संगीतमा गीतकार उपाध्यायका ५१ विश्व रेकर्ड

इकागज |
बैशाख ७, २०७८ १२:४ बजे

काठमाडौं :  नेपाली गीतकार डा. डि. आर (धर्मराज) उपाध्यायले गीत–संगीतबाट विश्वमै सबैभन्दा बढी विश्व रेकर्ड कायम गर्ने एक व्यक्तिको कीर्तिमान बनाएका छन् । विभिन्न फरक फरक शैलीका गीत,संगीत तयार गरेर उनले विश्वका तीन दर्जनभन्दा बढी विश्व रेकर्ड संस्थाबाट ५१ वटा विधामा विश्व रेकर्ड बनाएर संसारलाई यो विधामा उछिनेका छन् । 

यस अघि विभिन्न ३२ विधामा गिनिज अफ वल्र्ड रेकर्ड सहित विभिन्न रेकर्ड बनाएका डा. डि.आरले फेरि गीतसंगीत सम्बन्धि थप १९ वटा विधामा नयाँ रेकर्ड बनाए । योसँगै सोमबार उनले बनाएका विश्व रेकर्डको संख्या ५१ पुगेको छ ।

उनले यसपटक अमेरिकन बुक अफ वल्र्ड रेकर्ड, युरोपियन बुक अफ रेकर्ड, द ब्रिटिस वल्र्ड रेकर्ड, एशियन वल्र्ड रेकर्ड, युनिभर्सल रेकर्ड फोरम, आसाम वल्र्ड रेकर्ड, बँगाल वल्र्ड रेकर्ड, सुप्रिम वल्र्ड रेकर्ड, ओएमजी वल्र्ड रेकर्ड, एभरेष्ट वल्र्ड रेकर्ड, चम्पियन वल्र्ड रेकर्ड, ओएमजी वल्र्ड रेकर्ड, दुवई वल्र्ड ट्यालेन्ट बुकमा १९ फरक विधामा विश्व किर्तिमानी बनाएका हुन् ।

सोमबार राजधानीमा एक समारोहबीच पूर्व प्रधानमन्त्री लोकेन्द्र बहादुर चन्दले गीतकार तथा साहित्यकार डा. उपाध्यायलाई यी सबै वल्र्ड रेकर्डको प्रमाणपत्र प्रदान गरे । यस पटक उनले १५० भन्दा बढी देशको पर्यटनस्थलको नाममा गीत तयार गरेर, सबैभन्दा छोटो १८ अक्षरको गीत–संगीत तयार गरेर, एकै दिनमा चार वटा गीत लेखी, रेकर्ड गरेर रिलिज गरेर, १७५ देशका मुद्राहरूको नाममा गीत संगीत तयार गरेर, क देखि ज्ञ सम्म ३४ वटा प्रत्यक वर्णको गीत लेखी पुस्तक ल्याएर नयाँ नयाँ वल्र्ड रेकर्ड बनाएका हुन् ।

यस्तै ५५ वटा फरक फरक फुलको नाममा गीत लेखी रेकर्ड गराएर, सबैभन्दा धेरै पटक आमा तथा धेरै पटक बुबा शब्द प्रयोग गरी गीत रेकर्ड गराएर, विश्वका १६४ प्रजातिका चराको नाम समेटेर गरी बनाइ रेकर्ड गरेर उनले नयाँ कीर्तिमान बनाएका हुन् ।

यस्तै आफ्ना गीतहरू चिया पिउने सबैभन्दा बढी कपमा छापेर, सबैभन्दा बढी पोष्टकार्डमा छापेर, सकरात्मक सोचमा फाइदा सम्बन्धि गीत तयार गरेर, ६० वर्ष नाघेका ११ जना गायक गायिकाको स्वरमा एकै पटक गीत रेकर्ड गराएर डा. उपाध्यायले नयाँ कीर्तिमान कायम गरेका हुन् । 

विश्व रकेर्ड प्रमाणपत्र प्रधान गरिने सो कार्यक्रममा अग्रज गायिका ज्ञानु राणा, गायक तथा संगीतकार सागर अधिकारी, गायक जुगल आचार्यले आफ्ना विमोचित एक एक वटा गीत सुनाए । विश्व रेकर्डमा परेका आफ्ना गीत पनि उनले कार्यक्रममा सुनाएका थिए ।  सो कार्यक्रममा उपाध्यायको विश्व कीर्तिमानी गीति पुस्तक चोट, प्रेयसी तथा गीति संग्रह सपनाको महल, धडकन, धर्ति र जीवन, प्रतिभाको पनि पूर्वप्रधानमन्त्री चन्दले लोकापर्ण गरे ।

कार्यक्रममा बोल्दै पूर्व प्रधानमन्त्री चन्दले यसरी गीत –संगीत सम्बन्धि ५१ वटा विश्व रकेर्ड राख्ने डा. उपाध्याय विश्वकै विरलै श्रष्टाहरुमा पर्ने बताए । देशलाई चिनाउन डा. उपाध्यायले गरेको यो कार्य जति प्रशंसा गर्दा पनि कमै हुने पूर्व प्रधानमन्त्री चन्दको भनाइ थियो ।

पूर्व मन्त्री रामेश्वर राय यादबले पनि आफ्ना स्कुले साथी एवम गीतकार साहित्यकार डा. उपाध्यायले नसोचेको विश्व रेकर्ड बनाएर सबैलाई चकित तुल्याएको भन्दै खुसी व्यक्त गरे ।

कार्यक्रममा अर्का वक्ता डा. सुरेन्द्र केसीले राज्यले भ्रस्ट फटाहालाई तक्मा बाँडेको बेला एक नेपाली श्रष्टाले फरक ५१ वटा विधामा विश्व रेकर्ड बनाउनु सरकारकै लागि व्यंग्य भएको बताए । 

श्रष्टा डा. डि आर उपाध्यायले हामी नेपालीहरू पनि साहित्य तथा गीत संगीत सृजनामा विश्वका श्रष्टा भन्दा कम छैनौं भनेर प्रमाणित गर्न पछिल्लो तीन वर्षभित्रै आफूले यस्तो रेकर्ड बनाएको बताए ।  
 



Author

थप समाचार