‘डिसेम्बर फल्स’ टिजर : एक्सन र थ्रिलको पृष्ठभूमिमा आर्यन र उपासनाको रोमान्स

काठमाडौँ - स्टारडम फर्काउन संघर्षरत आर्यन सिग्देल अभीनित ‘डिसेम्बर फल्स’को टिजर सार्वजनिक भएको छ । बिहीबार मध्यान्न सार्वजनिक टिजरले एक्सन र थ्रिललाई पृष्ठभूमिमा राखेर कलाकारद्धय आर्यन र उपासना सिंह ठकुरीको प्रेमकथालाई प्रस्तुत गरेको छ । 

फिल्ममा उपासनासिंह ठकुरी नर्सको भूमिकामा रहेको टिजरले स्पष्ट गर्छ । उपासनाको प्रेमी हुनुबाहेक आर्यनको भूमिका भने स्पष्ट छैन । तर टिजरमा अटाएको एक्सनमा आर्यन जमेको महसुस हुन्छ । टिजरले अस्पताल द्वन्द्व सिर्जना हुने ठाउँको रुपमा फिल्ममा प्रयोग भएको संकेत गर्छ ।

---

महामारीअघि रिलिज भएको ‘चच हुँई’ आर्यन अभीनित अन्तिम रिलिज हो । बक्स अफिसमा एउटा क्लिन हिटको अपेक्षा गरिरहेका आर्यनको ‘म राजेश हमाल’ पनि रिलिजको पर्खाइमा रहेको फिल्म हो । 

प्रविन झाले निर्देशन गरेको फिल्मलाई महेश गुप्ताले खिचेका हुन् । फिल्ममा केदार भुसाल र प्रतीक पौडेलको लेखन रहेको छ । फिल्ममा सलोन बस्नेत, नरेश भट्टराई, दयाराम दाहाल आदि कलाकारको पनि अभिनय रहेको छ । रामप्रसाद रिजाल प्रस्तुत कर्ता रहेको फिल्म पुस १७ मा प्रदर्शन हुँदैछ । निर्माण टिमले केही दिनअघि मात्र भक्तपुरको वसन्तपुरमा फिल्मको गीत खिचेको थियो ।