अब कपिल शर्मा सो कहिले प्रसारण हुन्छ ?

मुम्बई :  टेलिभिजन सोमा कपिल शर्माको सोको प्रतीक्षा हरकोहीलाई रहन्छ ।  सर्वसाधारणदेखि भारतका सेलेब्रिटीसम्म यो सोका फ्यान छन् । त्यसैले यो सो बन्द भएपछि धेरैले मनोरञ्जनको डोज कम भएको महसुस गरेका छन् । 

केही महिना अघि यो सो बन्द हुँदा कपिल शर्माको व्यस्तता कारण मानिएको थियो । कपिल दोस्रो सन्तानको पिता हुँदा घरमा समय दिनुपर्ने कारण देखाउँदै केही समयका लागि यो सोको प्रसारण बन्द भएको थियो । तर, लामो समय भइसक्दा पनि कपिल सानो पर्दामा फर्किएका छैनन् ।

---

यसले सोका दर्शकलाई अधैर्य बनाएको छ । तर, स्रोतका अनुसार दर्शकले यो कार्यक्रम हेर्न अझै प्रतीक्षा गर्नुपर्ने भएको छ । कोभिड १९ को दोस्रो वेभका कारण हाल महाराष्ट्र सरकारले सुटिङमा प्रतिबन्ध लगाएको छ ।

त्यसैले पनि यो सो तत्काल प्रसारण हुने सम्भावना छैन । त्योबाहेक यो सोका प्रमुख अतिथि टेलिभिजन तथा सिनेमाका कलाकार हुन्छन् । अहिले न कुनै फिल्म  रिलिज छ न सुटिङ । सेलेब्रिटीविना सोमा चार्म नहुने कारणले पनि यो कार्यक्रम तत्काल प्रसारण नहुने दैनिक भास्करले समाचारमा उल्लेख गरेको छ । 

पहिला बन्द हुँदा मे महिनादेखि कार्यक्रम नियमित प्रसारण हुने बताइएको थियो । तर, स्थिति यस्तै रहे मे त के जुनमा पनि यो प्रसारण हुने सम्भावना नरहेको सोनी टेलिभिजनले जनाएको छ ।

यता कपिल शर्मा सो नआउने भए पछि सोनीले इन्डिन आइडललाई तन्काएको तन्काएकै छ । अप्रिलमा नै सकिने पर्ने सोमा प्रतियोगीले गाएको गाएकै छन् । विगत दुई हप्तायता टप ९ मा भएका कुनै पनि प्रतियोगी सोबाट बाहिरिएका छैनन् ।