'ब्रम्हास्त्र २' मा जोडिए रणवीर सिंह

मुम्बई- रणवीर कपूर र आलिया भट्ट स्टारर फिल्म  ‘ब्रह्मास्त्रः पार्ट वन-शिवा’ सन् २०२२ मा रिलिज भएको थियो । यो फिल्म बक्स अफिसमा ब्लकबस्टर भयो । जसका कारण यो फिल्म रिलिज भएदेखि नै फ्यानहरू यसको सिक्वेलको प्रतीक्षामा छन् । 

यसैबीच धेरै पटक यस्तो हल्ला फैलिएको छ कि रणवीर सिंह अयान मुखर्जीको फिल्म 'ब्रह्मास्त्र' को भाग-२ मा देवको भूमिकामा देखिने छन् । केही मिडिया रिपोर्टहरूमा ऋतिक रोशन वा कन्नड अभिनेता यशले यो भूमिका खेल्न सक्ने अनुमान गरिएको थियो । यद्यपि आधिकारिक रूपमा कसैको नाम पुष्टि भएको छैन । तर, अब एक रिपोर्ट अनुसार रणवीर सिंहले 'ब्रह्मास्त्र पार्ट २' मा देवको भूमिका निभाउने भएका छन् ।

---

न्यूज १८ को रिपोर्टअनुसार एक स्रोतबाट जानकारी प्राप्त भएको छ कि ‘ब्रह्मास्त्र २’ मा महत्त्वपूर्ण भूमिका खेल्न रणवीर सिंहलाई छनोट गरिएको छ र त्यो भूमिका रणवीर कपुरका पिता देवको हो । भूमिकाका लागि फाइनल मात्र नभएर उनले साइन पनि गरिसकेको जनाइएको छ ।

दोस्रो भागको स्क्रिप्टिङको काम अझै जारी छ र फिल्म २०२५ मा रिलिज हुने अपेक्षा गरिएको छ । अहिले अयान मुखर्जी ‘वार २’ मा व्यस्त छन् भने रणवीरले पनि यसै वर्ष  ‘बैजु बावरा’ को सुटिङ सुरु गर्नेछन् । तसर्थ, 'ब्रह्मास्त्र २' कहिले आउने हो भन्ने अझै स्पष्ट छैन ।

स्रोतका अनुसार यदि सबै ठीक भयो भने रणवीरले सन् २०२४ को मध्यमा सञ्जय लीला भन्सालीको ‘बैजु बावरा’ सुरु गर्नेछन् । 

यसअघि ‘ब्रह्मास्त्र २’ को छायांकन २०२५ को सुरुमा सुरु हुने भनिए पनि अब ‘डन ३’ सोही समयमा फ्लोरमा जाने बताइएको छ । यस्तो अवस्थामा रणवीरले पहिले ‘डन ३’ र त्यसपछि ‘ब्रह्मास्त्र २’ को सुटिङ गर्नेछन् ।

‘ब्रह्मास्त्र’ को कुरा गर्दा यो फिल्म बक्स अफिसमा सुपर डुपर हिट भएकाे थियाे । फिल्मको भिएफएक्स र फोटोग्राफीको निकै प्रशंसा भएको थियो । फिल्ममा रणवीर कपुर र आलिया भट्टले मुख्य भूमिका निर्वाह गरेका थिए भने शाहरूख खानले फिल्ममा केमियो गरेका थिए । 'ब्रह्मास्त्र' २०२२ को ब्लकबस्टर फिल्महरू मध्ये एक थियो जसले विश्वव्यापी रूपमा ४३१ करोड कमाएको थियो । 'ब्रह्मास्त्र' ले भारतमा २६९.४ करोडको व्यापार गरेको थियो ।