अलका याग्निकलाई न्यूरो संक्रमण, गुमाइन् सुन्‍ने क्षमता

मुम्बई- भारतीय चर्चित पार्श्व गायिका अलका याग्निकलाई दुर्लभ न्यूरो संक्रमण देखिएको छ । यही कारण यी चर्चित गायिकाले सुन्ने क्षमता गुमाएकी छन् । यो कुराको पुष्टि अलका आफैँले इन्स्टाग्राममार्फत मंगलबार गरेकी हुन् ।

अलकाले आफ्नो समस्याबारेमा जानकारी दिँदै फ्यान र साथी कलाकारहरूलाई चर्को आवाज र संगीतबाट टाढै रहन सुझाव समेत दिएकी छन् ।

---

९० को दशकदेखि बलिउडका कयौँ चर्चित र सदाबहार गीतमा आवाज दिइसकेकी अलकालाई एक दुर्लभ न्यूरो संक्रमण देखिएको हो । इन्स्टाग्राममा उनले एक पोस्टमार्फत अब आफूले सुन्न छाडेको बताएकी छन् ।

अलकाले आफूलाई भाइरल ज्वरोले आक्रमण गरेपछि यो समस्या सुरु भएको बताइन् । एक दिनभरको उडानपछि बाहिर आइसकेपछि आफ्नो सुन्ने क्षमता गुमेको जानकारी उनले दिएकी छन् ।

उनले लेखेकी छन्, ‘मेरा सबै फ्यान, साथी, फलोअर र शुभचि‍न्तहरू केही साताअघि जब म एक उडानबाट बाहिर निस्किरहेकी थिएँ तब मलाई लाग्यो मैले सुन्न सकिरहेकी छैन । यस तनावबाट गुज्रिएको एक सातापछि थोरै हिम्मत जुटाएर म यो सन्देश लेख्दैछु । म कहीँ हराएँ, बेपत्ता भएँ भन्ने मेरा साथी र शुभचिन्तकका लागि मौनता तोड्दैछु ।’

उनले आफ्नो सांगीतिक करिअरका क्रममा २१ हजारभन्दा धेरै गीत रेकर्ड गराएकी छन् । ९० को दशकदेखि निरन्तर उनी भारतीय संगीत जगतमा छाइरहेकी गायिका हुन् ।