निखिललाई कर्ण शाक्यको फिल्म निर्देशन गर्ने अफर

लकडाउन भर निखिल उप्रेतीले अध्यात्मको ज्ञान बाँड्दै हिँडे । टेलिभिजन अन्तर्वार्ताहरूमा निकै नै व्यस्त रहेका उनको कुरा गराइले मात्र होइन, लवाइले पनि आध्यात्मको लाइन समातेको भान हुन्थ्यो  । अन्ततः अध्यात्मले उनलाई फिल्ममा पनि अवसर दिलाएको छ । होटल व्यवसायी कर्ण शाक्यले बनाउन लागेको नयाँ फिल्म ‘महाजनको माली’ निर्देशनका लागि निखिललाई प्रस्ताव गरेका छन् । 

होटल व्यवसायी तथा समाजसेवी कर्ण शाक्यले फेसबुकमा आफूले फिल्म लेखिरहेको जानकारी गराउँदै निर्देशनका लागि निखिललाई अफर गरेको उल्लेख गरेका छन् । कर्ण शाक्य निकट प्रडक्सन म्यानेजर सुभाष काफ्लेले पनि निर्देशनका लागि निखिललाई प्रस्ताव गरेको पुष्टि गरेका छन् । तर, निखिलले भने आफूभन्दा अध्यात्म बुझ्ने कोही भए अरुलाईनै निर्देशनको अभिभारा दिन आग्रह गरेको काफ्लले बताए ।

---

‘एकदुई चरण कुरा भएर मौखिक सहमति भएको छ । सकभर अरु खोज्नु भएन भने म छँदैछु भन्ने कुरा निखिल सरको छ,’ काफ्लेले इकागजसँग भने ।  फिल्ममा निखिलले अभिनय भने गर्ने छैनन् । काफ्लले शाक्य फिल्ममा थिएटरका कलाकार लिने सोचमा रहेको बताए । ‘निखिल सरले गर्नु भयो भने केमियो गर्नुहुन्छ होला,’ उनले भने । कर्ण शाक्यले पैसाविना केही हुन्न भन्ने मनोविज्ञानले युवादेखि बृद्धसम्म छटपटिरहेको देखेपछि गरिब मालीको आँखाबाट सन्ुतुष्टि र सुखको तुलनात्मक तस्बिर पेस गर्ने बताएका छन् । 

कर्ण शाक्यले यसअघि ‘पल’ शीर्षकमा सिनेमा निर्माण गरेका थिए । पलभरको उत्तेजनाले मानिसको जिन्दगीमा आउने उथलपुथलको कथा समेटिएको फिल्मलाई रमेश बुढाथोकीले निर्देशन गरेका थिए । राजबल्लभ कोइराला र निशा अधिकारीको मुख्य भूमिका रहेको  फिल्ममा पहिलो भागको कथालाई नै दुरुस्त उल्टाएर देखाइएको थियो ।