आमिर–किरण डिभोर्समा ‘दंगल’ अभिनेत्री फातिमाको नाम

मुम्बई : आमिर खान र किरण रावले शनिबार  १५ वर्ष लामो विवाह टुंग्याउने निर्णय गरेको घोषणा गरे । आमिर र किरणको डिभोर्सको खबर उनीहरूले बनाउने फिल्म जस्तै ‘सरप्राइज’ थियो । यो अवधिमा न उनीहरूबीच मनमुटावको खबर आएको थियो न विवादको ।

अझ यो घोषणा त्यतिबेला आयो जतिबेला आमिर र किरण एउटै सेटमा थिए । खबरअनुसार आमिर र किरणकोे सम्बन्ध विच्छेदको विज्ञप्ति पढेर दुनियाँ चकित परिरहेका बेला उनीहरू भने लद्दाखमा ‘लालसिंह चढ्ढा’को सुटिङ गरिरहेका थिए ।

---

आमिर यो फिल्ममा अभिनय गरिरहेका छन् भने किरण यो फिल्मकी कार्यकारी निर्माता हुन् । यो फिल्म मात्र होइन, आमिर खान प्रडक्सनबाट बनेका ‘दंगल’, ,‘देल्ली बेली’‘पिपली लाइभ’, ‘सेक्रेट सुपरस्टार’ आदि फिल्मकी पनि कार्यकारी निर्माता किरण नै हुन् । 

यसरी अप्रत्यासित रुपमा भएको सम्बन्ध विच्छेदको पछाडि के कारण छ, हरकोही जान्न खोजिरहेका छन् । कसैले दुवैको सोच नमिलेका कारण विच्छेद भएको अनुमान गरेका छन् त कसैले आमिरको नयाँ अफेयरका कारण । कतिले भने लकडाउनको समयदेखि दुवैबीच दूरी बढेको खबर छापेका छन् । तर, सामाजिक सञ्जालमा भने दुवैको विच्छेद हुनुका पछाडि ‘दंगल’ अभिनेत्री फातिमा खना सेखको हात रहेको अनुमान पनि व्यापक छ । 

यो अनुमानलाई व्यापक बनाएका छन् ट्रोलर र मिमले । उनीहरूले फातिमासँग विवाह गर्नलाई नै किरण रावसँग सम्बन्ध विच्छेद गरेको बताएका छन् । आमिरले पहिली पत्नी रीना दत्तसँग पनि किरण रावसँग विवाह गर्ने भएपछि डिभोर्स गरेका थिए । 

‘दंगल’मा सँगै काम गरेका फातिमा र आमिरको निकटताको चर्चा पहिला पनि चल्ने गरेको थियो । अझ आमिरकै सिफारिसमा फातिमाले ‘ठग्स अफ हिन्दुस्तान’मा काम गर्ने मौका पाएपछि दुवैबीचको निकटताको खबरले औपचारिकता जस्तै पाएको थियो । अहिले किरणसँग डिभोर्स भएपछि पक्कै फातिमाकै कारण भएको भन्ने धेरैलाई पत्यार लागेको छ । हो कि होइन भन्ने थाहा पाउन चैं अझै केही समय कुर्नुपर्ने हुन्छ ।