रामचरणको फिल्मको एउटा गीतको सुटिङमा ७५ करोड खर्च

मुम्बई- पछिल्लो समय मेगा बजेट फिल्मको चलन बढेको छ । दृश्य, भिजुअल, गीत र एक्सनलाई प्रभावकारी बनाउन निर्माताहरूले बढी पैसा खर्च गरिरहेका छन् ।

तर धेरै पटक यो निर्माताका लागि सो लगानी सही साबित हुन सकेका छैनन् र फिल्म नराम्रोसँग फ्लप भएका छन् ।

---

त्यस्ता फिल्म फ्लप हुँदा समीक्षक र विश्लेषकहरूले निर्मातालाई कथामा ध्यान दिन सुझाव दिएका छन् । त्यस्तै मेगा बजेटको एउटा फिल्म अर्को महिना रिलिज हुँदैछ । यो फिल्मका गीतमा मात्रै निर्माताले ७५ करोड रुपैयाँ खर्च गरेका छन् । हो, हामी साउथ मुभीका अभिनेता रामचरणको आगामी फिल्म ‘गेम चेन्जर’ को बारेमा कुरा गर्दैछौं।

यो फिल्मको कुल बजेट करिब २५० करोड भारु रहेको जनाइएको छ । फिल्ममा रामचरणको अपोजिटमा कियारा आडवाणी छिन् । डेक्कन क्रोनिकलको रिपोर्ट अनुसार हालै फिल्मको प्रि रिलिज कार्यक्रम अमेरिकाको डलासमा आयोजना गरिएको थियो । यसको गीतमा निर्माताले ७५ करोड रुपैयाँ खर्च गरेका त्यहीवाट खुलेकाे हाे ।

‘गेम चेन्जर’का यी गीतका लागि विलासी र ठूला सेट जडान गरिएको थियो । फिल्म रिलिज हुन १२ दिन बाँकी छ, यो जनवरी १०, २०२५ मा मकर संक्रान्तिको अवसरमा विश्वभरका धेरै भाषाहरूमा रिलिज हुनेछ। फिल्मका हालसम्म ४ वटा गीत रिलिज भइसकेका छन् । यद्यपि ट्रेलर र पाँचौं गीत आउन बाँकी छ । पाँचौं गीतलाई दर्शकले सिनेमाघरमा मात्रै हेरोस् भन्ने निर्माताको चाहना रहेको जनाइएको छ ।

‘गेम चेन्जर’ को ‘जरगण्डी’ गीत ७० फिट अग्लो पहाडी गाउँको सेटमा खिचिएको हो । यसको सुटिङ गर्न १३ दिनभन्दा बढी समय लागेको थियो । यसमा ६ सय नर्तक छन्, जसले ८ दिनमा सुटिङ पुरा गरेका थिए । जसको कोरियोग्राफी प्रभु देवाले गरेका हुन् । जम्पनरा जुटबाट बनेको यस गीतमा इकोफ्रेण्डली लुगा प्रयोग गरिएको थियो ।

उता ‘रा माचा माचा’ गीतमा १ हजारभन्दा बढी नर्तक राखिएको छ । ‘रा माचा माचा’  गीतको छायांकन देशका विभिन्न स्थानमा गरिएको छ । यसले भारतीय लोक नृत्य र लोक कलाको झलक देखाउँछ। जसमा रामचरणसँग १ हजारभन्दा बढी नर्तकले प्रस्तुति दिएका छन् । योसँगै ‘नाना हयाना’ पहिलो भारतीय फिल्म गीत बनेको छ, जसलाई ‘इन्फ्रारेड क्यामेरा’बाट खिचिएको छ । यो गीतलाई रामचरण र कियारा आडवाणीले न्युजिल्यान्डको सुन्दर लोकेशनमा खिचेका हुन् । यो गीत छायांकन गर्न ६ दिन लागेको थियो ।