अर्जेन्टिनाका फ्यान जीवन लुईंटेलको हेर्नुस् फुटबल कौशल

काठमाडौं :  कोपा अमेरिका र युरो च्याम्पियनसिपको फाइनल हुन एक दिन मात्र बाँकी छ । कोपाले नयाँ विजेता आइतबार बिहान पाउँदैछ भने युरोले आइतबार मध्यरातमा । सर्वेक्षण नै नगरे पनि भन्न सकिन्छ कोपाको फाइनलमा पुगेका दुई टिम ब्राजिल र अर्जेन्टिना नेपालीहरूले सबैभन्दा बढी मन पराउने टिम हुन् ।

विश्वकपमा नेपालीहरू यी दुईमध्ये एकले जितुन् भन्ने चाहान्छन् । तर, यो पटकमा कोपामा कोही एकले हार्नेछ । तर, अभिनेता जीवन लुईंटेल चाहान्छन् यो पालि अर्जेन्टिनाले जितोस् । उनले शनिबार बिहानै अर्जेन्टिनाको पक्षमा आफ्नो मत मात्र प्रकट गरेका छैनन्, उनले नेपालको जर्सी लगाएर आफ्नो फुटबल कौशल पनि देखाएका छन् । 

---

‘बाटिस्टुटा र आर.बाजियोको फ्यान थिएँ । भरे र भोलिको म्याच पनि यही लिगेसीको पक्षमा । टिभीको मात्र हैन मैदानको मोह पनि कम थिएन त्यो बेला ।’ उनले फेसबुकमा लेखेका छन् ।

‘जाग चम्क लम्क है’ भन्ने गीत पाश्र्वमा बजाउँदै जीवनले आफू फुटबलको ओठे फ्यान मात्र हैन है भन्ने सन्देश पनि दिएका छन् । उनले लगभग १ मिनेट लामो भिडियोमा ढुक्कसँग बल ‘जगल’ गरेका छन् । 

जीवन फुटबलका नियमित दर्शक हुन् । उनी अहिले अमेरिकामा छन् तर नेपालमा हुँदा कुनै ठूलो प्रतियोगिता छ भने जीवन रंगशाला पुग्ने गरेका थिए । ‘सानैदेखि फुटबल खेलियो । पछि भिन्न पेसामा लागे पनि फुटबल बिर्सन सकिएन । फुर्सद भएको बेला नेपाली टिमको हौसला बढाउन हरेक चोटि पुग्ने गरेको थिएँ,’ उनले इकागजसँग छोटो कुराकानी गर्दै भने । आइतबार बिहानको खेलमा भने मेसीले कप उचाले हुन्थ्यो भन्ने चाहाना रहेको पनि जीवनले बताए ।