ब्राट पिटको ‘बेबिलोन’मा मार्गोट

लसएञ्जल्स : ‘ला ला ल्यान्ड’ निर्देशक डेमियन चेजलको नयाँ फिल्म ‘बेबिलोन’मा एम्मा स्टोन निर्देशकको पहिलो रोजाइमा थिइन् । एक वर्षअघि नै एम्मा र डेमियनले दोस्रो पटक सहकार्य गर्न लागेको खबर सार्वजनिक भएको थियो । तर, फिल्मको सुटिङ समय नजिकँदै गर्दा यो फिल्मबाट एम्माले हात झिकेको खबर सार्वजनिक भएको छ ।

डेडलाइनले एम्माले फिल्म छाड्न लागेको बताउँदै उनको ठाउँमा निर्माण टिमले मार्गोट रोबीलाई लिन लागेको खबर छापेको छ । एम्माका अन्य प्रोजेक्टसँग ‘बेबिलोन’को सुटिङ जुधेकाले उनले यो फिल्म छाड्न लागेको भेराइटीले लेखेको छ । फिल्ममा अब मार्गोटले ब्राट पिटसँग रोमान्स गर्नेछन् । ब्राट पिट र मार्गोटले यसअघि ‘वन्स अपन अ टाइम इन हलिउड’मा सँगै काम गरेका थिए । यो फिल्म पनि ‘वन्स अपन अ टाइम इन हलिउड’ जस्तै फिल्म उद्योगकै कथामा आधारित रहनेछ । चेजलले यसअघि नै फिल्मले मुक समयको फिल्मी कथालाई पर्दामा उतार्ने बताएका थिए । 
 

---