राज कुन्द्रा पोर्नोग्राफी मुद्दामा सेर्लिन चोपडाको बयान : शिल्पाले पनि मेरो कामको तारिफ गरेकी थिइन्

मुम्बई :  एप्समार्फत पोर्न फिल्म बाँडेको आरोपमा बलिउड अभिनेत्री शिल्पा सेठ्ठीका पति राज कुन्द्रा समातिएको एक महिना भयो । त्योबीचमा प्रहरीले राज कुन्द्रादेखि शिल्पा सेठ्ठीसम्मको बयान लिइसकेको छ ।  

यही क्रममा प्रहरीले राज कुन्द्राले फिल्म बनाउने प्रयोग गर्दै आएका अभिनेत्रीहरूको पनि बयान लिने क्रम सुरु गरेको छ । तर, पतिको व्यापारका बारेमा शिल्पा कति संलग्न थिइन् वा जानकार थिइन्, प्रहरीले खुलेर बोलेको छैन ।

---

जबकि शिल्पाले पतिको बचाउ गर्ने उद्देश्यसहित राजले पोर्न हैन इरोटिक फिल्म बनाएको प्रहरीमा बयान दिएकी थिइन् र उनले आफूलाई राजको व्यापारको विषयमा जानकारी नभएको पनि दाबी गरेकी थिइन् ।

तर, राजको पोर्नाेग्राफी फिल्मकी एक अभिनेत्री सेर्लिन चोपडाले  प्रपर्टी सेललाई दिएको बयानमा शिल्पा राजको कामबारे पूर्ण जानकार रहेको बताएकी छिन् । टाइम्स अफ इन्डियाले छापेको समाचारअनुसार राजले सेर्लिनलाई शिल्पाले पनि उनको कामको तारिफ गरेको भनेर नग्न दृश्य दिन उत्साहित गरेको बताएकी थिइन् ।

‘सुटिङको दौरान मलाई हौस्याइयो । मैले गज्जब गरेको भन्थे र शिल्पाले मेरो फोटो र भिडियो हेरेर तारिफ गरेको पनि बताउँथे । जब तपाईं सिनियरबाट प्रशंसा पाउनुहुन्छ, तपाईंलाई गलत गरिरहेको जस्तो लाग्दैन । गरिरहेको काम झन् राम्रो गर्न चाहानुहुन्छ,’ सेर्लिनको बयानलाई उद्धृत गर्दै टाइम्स अफ इन्डियाले लेखेको छ । 

सेर्लिनले बयानमा सुरुमा आफूलाई एप ग्ल्यामर, फेसन र रमाइलोका लागि बनाइएको बताए पनि पछि सेमीन्युड र न्युड भिडियो खिच्ने गरिएको पनि बताएकी छिन् । 
उनले मुम्बईको क्राइम बेन्चलाई सबैभन्दा पहिले यो एपको बारेमा आफूले नै खबर गरेको पनि बताएकी छिन् ।