गे पुरुषको अनुभव समेटिएको  ‘बिट्विन क्विन्स एन्ड द सिटिज’ बजारमा

काठमाडौं :  लेखक निरञ्जन कुँवरको अङ्ग्रेजी पुस्तक ‘बिट्विन क्विन्स एन्ड द सिटिज’ सार्वजनिक गरिएको छ । जुममार्फत् शनिबार पुस्तकको भर्चुअल विमोचन गरिएको हो ।  पुस्तकमा लेखक कँवरले लैङ्गिक पहिचान, समलिङ्गी सम्बन्ध र रूढिवादी नेपाली समाजमा आफ्नो स्वअस्तित्वको खोज गर्ने प्रयास गरेका छन् । एउटा नेपाली ‘गे’ले लेखेको सम्भवतः पहिलो संस्मरण हो, यो पुस्तक । 

कार्यक्रममा लेखिका मञ्जुश्री थापाले असाध्यै राम्रोसँग लेखिएको, लयात्मक र मन छुने पुस्तक ‘बिट्विन क्विन्स एन्ड द सिटिज’ रहेको बताइन् । ‘यो महत्वपूर्ण पुस्तक हो । यसले लैङ्गिक अल्पसङ्ख्यकलाई आफ्नो लैंगिकता र पहिचानबारे बोल्ने भाषा दिएको छ,’ उनले भनिन् ।   क्वयेर पहिचानलाई व्याख्या गर्ने भाषाको खोज भइरहेको समयमा संस्मरण लेखन एउटा सिर्जनात्मक हस्तक्षेप नै रहेको उनको भनाइ छ । उनले थपिन्, ‘यो पुस्तक राजनीतिक भाषण होइन । यो त आफ्नो वरिपरिका मानिसभन्दा पृथक् भएर नेपाल जस्तो ठाउँमा हुर्कनु कति गाह्रो, कति डरलाग्दो हुन्छ भनेर देखाउन लेखिएको निजात्मक अनुभव हो ।’ 

---

पुस्तकमाथि टिप्पणी गर्दै अर्का वक्ता ब्लगर लेक्स लिम्बूले भने, ‘सन् २०१८ मा निरञ्जन कुँवरले यो पुस्तक लेख्दै छु भनेर सुनाउँदा औधी खुसी भएको थिएँ । हामीलाई चाहिएका नै यस्ता कुराहरु हुन् । त्यो पनि धेरै सङ्ख्यामा ।’ ‘म लन्डनमा हुर्कंदै गर्दा,’ उनले थपे, ‘क्वयेर लेख्न पढ्न पाइन्थ्यो । नेपालमा भने त्यस्तो केही पाइँदैनथ्यो । तर केही वर्षदेखि नेपाली क्वयेरहरूले आफ्ना कथा लुकाउने होइन, बाहिर ल्याउने गरिरहेका छन्, ती कथाको स्वामित्व आफूले ग्रहण गर्न थालेका छन् ।

‘बिट्विन क्विन्स एन्ड द सिटिज’ थुप्रै क्वयेरहरुलाई आफ्नो अनुभव बाढ्न प्रोत्साहित गर्नेछ ।’ युवा वयस्कताको सुरुवाती समयमै नेपाली गे पुरुषका रुपमा मेरा अनुभवबारे लेख्ने प्रेरणा आफूलाई मिलेको लेखक कुँवरले बताए । ‘त्यो प्रेरणाका पछाडि नेपाली साहित्यिक धरातलमा ठूलो खाडल छ भन्ने ज्ञान थियो कि सायद, जब मैले नेपाल फर्कने निर्णय गरें, त्यो मुख्यतः लेख्नका लागि नै थियो,’ उनले भने, ‘अन्य कुनै काममा झैं लेखनका लागि अभ्यास र प्रतिबद्धता चाहिन्छ । म खुसी छु, मैले त्यो उद्देश्य प्राप्त गर्न सकें ।’  पुस्तक फाइनप्रिन्टले प्रकाशनमा ल्याएको हो ।