रेकर्ड खाने विजयको ट्विट

मुम्बई :  ट्विटर इन्डियाले सोमबार वर्षभरिका चर्चित ट्विटको तथ्यांक सार्वजनिक गर्यो । उसले सार्वजनिक गरेको तथ्यांकमा सर्वाधिक कोट भएका ट्विट, लाइक पाउने ट्विट र रिट्विट भएका ट्विटको सूची थियो । तर, यी तीनै विधामा फिल्मको वर्चस्व रह्यो । सन् २०२०मा सर्वाधिक कोट भएको ट्विटमा अमिताभ बच्चनले रेकर्ड राखे । अमिताभ बच्चनले आफूलाई कोभिड पोजेटिभ देखिएको ट्विटलाई लाखौं मानिसले कोट गरेका थिए । 

उत्कृष्ट तीन ट्विटको सूचीमा क्रिकेटर विराट कोहलीको ट्विट पनि सामेल रह्यो । उनले अनुष्का शर्मा गर्भवती भएको संकेत दिने फोटो राख्दै आउँदो वर्षको जनवरीबाट आफूलाई दुईबाट तीन हुने खबर सार्वजनिक गरेका थिए । उनको यो ट्विटले सर्वाधिक लाइक पाउने रेकर्ड कायम गर्यो । सर्वाधिक रिट्विट हुने ट्विटको रेकर्ड तमिल फिल्मस्टार विजयको नाममा रह्यो ।

---

उनले ‘मास्टर’ फिल्मको सुटिङ सेटबाट ट्विट गरेको तस्बिर सर्वाधिक रिट्विट भएको थियो । नेभेली भन्ने ठाउँलाई धन्यवाद दिएको विजयको ट्विट १ लाख ५० हजारभन्दा ज्यादा संख्यामा रिट्विट भएको थियो । विजयको ‘मास्टर’ तमिलनाडुको सबैभन्दा ठूलो फेस्टिभल पोंगलको अवसर पारेर रिलिज हुँदैछ ।