अमेरिकी दूतावासले गाईजात्रालाई एलजीबीटीक्यूआई प्लसको गौरव समारोहको रुपमा मनाउने

काठमाडौं : अमेरिकी दूतावास काठमाडौँले यस वर्षको गाईजात्रा महोत्सवलाई एलजीबीटीक्यूआई प्लस गौरवका रूपमा मनाउने भएको छ । कार्यक्रममा अमेरिकी राजदूत र्‍यान्डी बेरी, अभियन्ता तथा मानवअधिकारकर्मी एन्जल लामा, लेखक निरञ्जन कुँवर र चर्चित लोकगायक प्रकाश सपुतको  सहभागिता रहनेछ । भर्चुअल रुपमा हुने कार्यक्रमलाई पूर्व मिस नेपाल तथा सञ्चारकर्मी माल्भिका सुब्बाले सञ्चालन गर्नेछिन् ।

गाईजात्रा पर्व परम्परागत रूपमा वर्ष दिनभित्र दिवङ्गत भएका आफन्तको सम्झनामा मनाइन्छ । २०६१ सालदेखि नेपालमा स्थानीय एलजीबीटीक्यूआई समुदायले यस पर्वलाई आफ्नो गौरवको उत्सव मनाउने अवसरको रूपमा समेत उपयोग गर्दै आइरहेको छ ।

---

यो कार्यक्रम अमेरिकी दूतावासको फेसबुक पेजबाट प्रत्यक्ष प्रसारण गरिनेछ र यसले समानता, स्वतन्त्रता र न्यायको खोजीमा लागिपरेका नेपालभरका एलजीबीटीक्यूआई व्यक्तिहरूप्रतिको अमेरिकी सरकारको प्रतिबद्धतालाई पुनर्पुष्टि गर्नेछ ।

कार्यक्रममा नेपालमा एलजीबीटीक्यूआई प्लस अधिकारको वर्तमान स्थिति, गाईजात्रा र गौरवको सम्बन्ध, नेपाल र विश्वव्यापी रूपमा एलजीबीटीक्यूआई प्लस व्यक्तिहरूविरुद्ध जारी हिंसा र भेदभाव र नेपालमा यौनिक तथा लैङ्गिक अल्पसङ्ख्यक समुदायको मानव अधिकार र हितका लागि जागरूकता बढाउन र वकालत गर्नका लागि अब गर्नुपर्ने काम आदि विषयमा छलफल हुनेछ ।