मधेश एकताको पक्षमा ‘एक’

काठमाडौं  :  ओटिटी प्लेटफर्ममा रिलिज हुन लागेको चलचित्र ‘एक’को ट्रेलर सार्वजनिक भएको छ । चलचित्र सिनेमा घर एप, डिसहोमको च्यानल ५५५, नेट टिभी, म्याक्स टिभी, र भाइ नेट तथा ओहो मुभिजबाट प्रदर्शनमा आउन लागेको हो । 

‘स्पाइ जन्र’को चलचित्रमा भूमिका विशाल पोखरेल, ज्योत्स्ना योगी, प्रमोद अग्रहरी आदि कलाकारको अभिनय रहेको छ ।  विदेशी स्वार्थको इशारामा देशमा विखण्डनको हिंसात्मक अभियान चल्नु, नेपालको आन्तरिक सुरक्षाका लागि अत्यन्त चुनौतीपूर्ण विषय हो। मधेस विकास र शान्तिको पक्षमा अगाडि बढ्ने प्रक्रियामा रहँदा यसलाई विथोल्न स्वतन्त्र मधेसको अवधारणा स्थापित गरेर नेपाललाई सधै अस्थिर राखिराख्ने षड्यन्त्रको शिकार नेपाल भएको यथार्थलाई फिल्मले विषय बनाएको छ ।

---

स्क्रिप्ट फ्याक्ट्रीको ब्यानरमा बनेको यो चलचित्रको निर्माता आत्मा गुरागाईं र सोफिया थापा हुन् । मनोज पण्डितको निर्देशन रहेको फिल्ममा छायांकन दीपक बज्राचार्य, सम्पादन भरत रेग्मी तथा संगीत गोविन्द मधुर आचार्य, पुष्कर महतो र हरि लम्सालको रहेको छ ।

त्यस्तै फिल्ममा प्रमोद खड्काको एक्सन रहेको छ ।  चलचित्र ‘एक’मा प्रमोद खड्का, रामशरण पाठक, मदन ठाकुर, सुरेश शाह, सविर चुरौटे, हरून अली, रमेश महर्जन, रिसिका घिमिरे तथा बालकलाकार विश्वन्त पोखरेललगायतका कलाकारको पनि अभिनय रहेको छ । कोरोना महामारीका कारण थला परेको सिनेमा उद्योगको विकल्प खोज्दै डिजिटल प्लेटफर्ममार्फत यही असोज २१ गते घटस्थापनाका दिनदेखि विभिन्न ओटिटी प्लेटफर्ममा रिलिज हुनेछ ।