फरक भिडियोमा भीषणको प्रयास

काठमाडौं : फरक कन्सेप्टमा भीषणको भिडियो मंगलबार धरानको पुतली लाइन स्थित वेब क्याफे एन्ड चिकेन स्टपमा एक्सन कट चलिरहेको थियो । त्यहाँ धराने गायक ज्ञान सुब्बाको गीतको छायांकन भैरहेको थियो ।

वेटर र ग्राहकको रूपमा कलाकारहरु अभिनय गरिरहेका थिए भने निर्देशक भीषण राईले उक्त म्युजिक भिडियोको निर्देशन गर्दै थिए । निर्देशक भीषण राईले भिडियोमा नयाँ कन्सेप्ट पस्किन लागेको बताए ।

---

उनले भने 'मैले यो भिडियोमा फरक कन्सेप्ट ल्याएको छु, दर्शकलाई नयाँ लाग्न सक्छ ।' धरान र चतराको विभिन्न स्थानमा उक्त म्युजिक भिडियोको छायांकन गरिएको थियो । आखिर के को लागि होला ? बोलको उक्त म्युजिक भिडियोमा लोकप्रिय अभिनेता प्रेम सुब्बालाई मुख्य रुपमा प्रस्तुत गरिएको छ । भिडियोमा कलाकार बादल श्रेष्ठ, रुबिना केसी र इसिता राईको पनि अभिनय रहेको छ ।

उक्त गीतमा शब्द रबिन खावाहाङ राईको रहेको छ भने संगीत शरद सिन्हाको रहेको छ । सिल्भर इन्टरटेनमेन्ट्को प्रस्तुति रहेको भिडियोमा क्यामेराम्यान भुपेन्द्र तुम्बाहाम्फे, ड्रोन अप्रेटरमा सुमन तामाङ र मेकअप आर्टिस्ट लोकेस थापा रहेका छन् । भिडियो बाबाको मुख हेर्ने दिनमा रिलिज गरिने निर्देशक भीषण राईले बताए ।