रजनीकान्तका फ्यानको नयाँ काण्ड :  बोको काटेर पोस्टरलाई बलि

मुम्बई - संसारमा रजनीकान्त मात्र यस्ता कलाकार होलान् जसका फ्यान उनका लागि हदसम्म जान सक्छन् । उनका फिल्म रिलिज भएको समयमा कम्पनीले बिदा दिने त सामान्य भइहाल्यो । ठाउँ ठाउँमा फ्यानले उनको सालिकसमेत बनाएका छन् । 

तर हालसालै यस्ता फ्यान समाचारमा आएका छन् जसले रजनीकान्त हैन उनको पोस्टरलाई पूजा गरेका छन् ।  बुधबार सामाजिक सञ्जालमा एउटा भिडियो भाइरल भयो जहाँ फ्यानले बोको काटेर रगत पोस्टरमा छापे । केही दिनअघि मात्र रजनीकान्तको नयाँ फिल्म ‘अनाथे’को पोस्टर सार्वजनिक भएको थियो । फ्यानले यही पोस्टरमा बोको काटेर बलि दिएका थिए । 

---

तर बलि दिने उनको निर्णयको आलोचना भएको छ । रजनीकान्तलाई माया गर्न निर्दोष जनावरको ज्यान लिएको भन्दै ती फ्यानको आलोचना भएको छ । अझ रजनीकान्तको फ्यानको संगठन प्रमुखले फ्यानको नाममा यस्ता आचरणको निन्दा गर्न र यस्ता काम नगर्न आग्रह गरेका छन् । 

 ‘यो काम निन्दा योग्य छ । हामी कसैलाई पनि यस्ता गतिविधि नगर्न आग्रह गर्छौँ,’ संगठन प्रमुख भिएम सुधाकरले भनेका छन् ।  ‘अनाथे’ यही वर्षको तिहारमा रिलिज हुँदैछ जहाँ फिल्ममा रजनीकान्तसँगै नयनतारा, कीर्ति सुरेश आदि कलाकारको अभिनय छ ।