सम्मानसहित मदनकृष्ण र गौरीको 'सुनको कचौरी' रिलिज

काठमाडौँ-   नयाँ गीत 'सुनको कचौरी' रिलिज कार्यक्रममा देवीथान म्युजिकले अग्रजलाई पनि सम्मान गरेको छ । उद्याेगपति विनोद चौधरीको प्रमुख आतिथ्यता, बरिष्ठ कलाकार नीर शाह र हरिवंश आचार्यको आतिथ्यतामा उक्त कार्यक्रम सम्पन्न भएको थियो।

उक्त कार्यक्रममा विनोद  चौधरीलाई पनि सम्मान गरिएको थियो। कदरपत्र, दुर्गाको प्रतिमाको साथमा उनले नेपाली काल, साहित्य क्षेत्रमा गरेको योगदानका लागी सम्मान गरिएको थियो। त्यस्तै नीर शाह, हरिवंश आचार्य, मदनकृष्ण श्रेष्ठ लगायतका व्यक्तिलाई पनि उक्त कार्यक्रममा सम्मान गरिएको थियो।

---

मदनकृष्ण श्रेष्ठ र मिलन नेवारको आवाजमा रहेको 'सुनको कचौरी' बोलको गीतमा राजनराज शिवाकोटीको शब्द र संगीत रहेको छ। राजेश पूमा राईले निर्देशन गरेको भिडियोमा मदनकृष्ण श्रेष्ठ र गौरी मल्ल फिचर रहेका छन्।

उत्सव दाहालले खिचेको भिडियोलाई विकास दाहालले सम्पादन गरेका छन्। भिडियोमा सन्तोष राजबाहकको कोरियोग्राफी रहेको छ। गीतको भिडियो रिलिज कार्यक्रममा नीर शाह, हरिवंश आचार्य र विनोद चौधरीले भिडियोको बारेमा बोलेका थिए। मदनकृष्ण र गौरीको जोडी र भिडियोको प्रस्तुति तारिफयोग्य रहेको प्रतिक्रिया सवैले दिएका थिए।