‘ब्ल्याक विडो’ विवादमा स्कारलेट जोन्सन र डिज्नेको कुरा मिल्यो

लसएन्जल्स -  ‘ब्ल्याक विडो’को रिलिजलाई लिएर डिज्नेसँग असन्तुष्ट भएकी स्कारलेट जोन्सनले डिज्नेविरुद्ध हालेको मुद्दा सल्टिएको छ । बिहीबार जोन्सन र डिज्नेबीच सहमति भएसँगै जोन्सनले मुद्दा फिर्ता लिएको समाचारमा जनाइएको छ ।

‘ब्ल्याक विडो’लाई डिज्नेले ओटिटीमा समेत एकै चोटि रिलिज गर्दा आफूलाई ५० मिलियन अमेरिकी डलर घाटा लागेको भन्दै स्कारलेट जोन्सनले डिज्नेविरुद्ध मुद्दा हालेकी थिइन् । जवाफमा डिज्नेले सम्झौताअनुसार नै फिल्म रिलिज भएको रुखो जवाफ पठाएको थियो ।

---

पछि मुद्दा चर्कँदै जाँदा धेरै कलाकार जोन्सनको पक्षमा उभिएका थिए । यसरी मुद्दा चर्कँदै जाने लक्षण देखेपछि डिज्ने सहमतिमा आउन बाध्य भएको थियो । तर दुवैबीच के कतिमा र कसरी सहमति भयो भन्ने कुरा बाहिर आएको छैन तर दुवैले सहमतिले फेरि सहकार्य गर्ने वातावरण बनेको प्रतिक्रिया दिएका छन् ।

जोन्सनले बिहीबार आफ्नो भनाइ राख्दै आफूहरूबीच सहमति भएको र डिज्नेसँग भविष्यमा पनि सहकार्य गर्न तयार रहेको बताएकी छिन् । महामारीकै बीचमा रिलिज भएको ‘ब्ल्याक विडो’ले राम्रो समीक्षाका बाबजुद अपेक्षित व्यापार गर्न सकेको थिएन । यो फिल्म हलसँगै डिज्नेको ओटिटी प्लेटफर्म डिज्नेप्लसमा पनि एक साथ रिलिज भएको थियो ।