बुटवलमा ‘भाँडाकुटी’ खेल्न दुई हिरोइनको खोजी

काठमाडौं : सरकारले फिल्म सुटिङ खुला गरेसँगै धमाधम फिल्महरू फ्लोरमा जाने आस गरिएको थियो । तर, जाडोका कारण फिल्मकर्मी उतिसारो तातिएका छैनन् । धेरै फिल्मकर्मी प्रिप्रडक्सनको काम गरिरहेका छन् । यस्तैमा फागुन १ गते सुटमा जाने भनिएको फिल्म ‘भाँडाकुटी’ले फिल्मका लागि थप दुई हिरोइन चाहिएको बताएको छ ।

दसैँ छेउछाउ घोषणा गरिएको फिल्ममा तीन हिरो र तीन हिरोइन रहने भनिए पनि  निर्माण टिमले बाँकी दुई हिरोइनको टुंगो लगाउन सकेको थिएन ।
सुत्रका अनुसार प्रोड्युसरहरू चलेकै हिरोइन लिने पक्षमा छन भने निर्देशक नयाँ अनुहारलाई मौका दिने अडानमा छन् । फिल्ममा बेनिशा हमाल र मुकुन भुसाल भने पहिले नै अनुबन्धित भैसकेका छन ।

---

बाँकी दुई हिरोको रुपमा रिजेन थापा र महावीर बिश्वकर्मा तय भैसकेका छन । रिजेन र महावीर कै जोडीका लागि निर्माण टिमले दुई हिरोइनको खोजी गरेको हो ।  फिल्मलाई किरण बिकले निर्देशन गर्न लागेका हुन् । निर्माण टिमले केही समय अघि कलाकारसहित बुटबलको विभिन्न स्थानमा लोकेसन स्काउटको गरेको थियो । फिल्मको सम्पूर्ण सुटिङ बुटबलमा हुने जानकारी गराइएको छ ।