एक आपसमा भिड्दै जोनी र एम्बरका फ्यान

लसएन्जल्स : सेलिब्रेटी जोडी छुट्दा उनीहरू मात्र छुट्दैनन् फ्यान पनि विभाजित हुन्छन् । पहिला सेलिब्रेटीले गरेको जे पनि रुचाउने फ्यान पछि उनीहरूले जतिसुकै राम्रो काम किन नगरुन् फिटिक्कै रुचाउँदैनन् । 

अहिले फ्यानको यही मौसमी बानीको सिकार भएका छन् जोनी डेप र एम्बर हर्ड । बुढाबुढीको झगडामा कित्ताकाट भएका फ्यान, अहिले एक अर्कालाई सकाउन लागिपरेका छन् ।बेलायती पत्रिका ‘सन्’को मुद्दा जोनीले हारे । उनले पत्रिकाले आफूलाई ‘स्वास्नी पिटुवा’ लेखेको भन्दै क्षतिपूर्तिको दाबीसहित मुद्दा हालेका थिए । तर, अदालतले उनको पक्षमा फैसला गरेन ।

---

यसको असर के भयो भने उनले ‘पाइरेट्स अफ दि क्यारेबियन’बाट हात धुनु पर्यो । वाल्ट डिज्नेलाई उनलाई फ्रेन्चाइजबाट हटाउन बाध्य पार्नेमा एम्बर हर्डका शुभचिन्तकको ठूलो हात थियो । त्यसपछि जोनीका फ्यान पनि एम्बरलाई ‘अक्वामेन’को सिरिजबाट हटाउनु पर्ने मागसहित सक्रिय भए । एम्बरलाई पनि जोनी बराबर कै सजाय हुनुपर्यो भन्ने उनीहरूको माग थियो । डिसी कमिक्सले पनि जोनीको फ्यानसँग पंगा लिन चाहेन । तर, उसले डिज्नेले जस्तो एम्बरलाई फिल्मबाट ‘किकआउट’ गरिहालेन । एम्बरको रोल सानो पारिएको बतायो ।

यतिले पनि जोनीका फ्यानको रिस मरेको छैन । उनलाई चौतफी ‘बाइकट’ गर्नुपर्ने उनीहरूको माग ज्यूँका त्यूँ छ । भर्खरै पनि एम्बरले घरेलु हिंसामाथि बोल्ने मौका पाइन्, त्यो पनि पैसासहित । जब त्यसको भिडियो बाहिरियो, जोनीका फ्यानले भिडियोमाथि रिस पोखे । एम्बरको भिडियोमा लाइकभन्दा डिसलाइकको मात्रा ज्यादा भयो । यसले के देखायो भने सेलिब्रेटी त पुरानो सम्बन्ध बिर्सेर ढिलोचाँडो अघि बढ्लान् तर फ्यान बढ्नेवाला छैनन् ।